ევროკომისიის პრეზიდენტმა ურსულა ფონ დერ ლაიენმა განაცხადა, რომ ევროკომისია მალე წარადგენს მე-19 სანქციების პაკეტს, რომელიც რუსეთის კრიპტოაქტივებს, საბანკო და ენერგეტიკულ სექტორებს შეეხება.
ფონ დერ ლაიენმა ამის შესახებ აშშ-ის პრეზიდენტ დონალდ ტრამპთან სატელეფონო საუბრის შემდეგ X-ზე დაწერა.
„პროდუქტიული საუბარი მქონდა აშშ-ის პრეზიდენტ დონალდ ტრამპთან რუსეთზე ეკონომიკური ზეწოლის მიზნით დამატებითი ზომების მიღებით ერთობლივი ძალისხმევის გაძლიერებაზე. კომისია მალე წარადგენს სანქციების მე-19 პაკეტს, რომელიც კრიპტოაქტივებს, ბანკებსა და ენერგეტიკას შეეხება, - წერს ფონ დერ ლაიენი.
ფონ დერ ლაიენმა აღნიშნა, რომ რუსეთის საომარი ეკონომიკა, რომელიც წიაღისეული საწვავის შემოსავლებით არის მხარდაჭერილი, უკრაინაში სისხლისღვრას აფინანსებს.
მისი თქმით, ევროკომისია შესთავაზებს ევროკავშირს დააჩქაროს რუსეთიდან წიაღისეული საწვავის იმპორტის ეტაპობრივად გაუქმება.
შეგახსენებთ, მანამდე Bloomberg წერდა, რომ ევროკავშირმა რუსეთის წინააღმდეგ სანქციების მე-19 პაკეტის წარდგენა გადადო მას შემდეგ, რაც აშშ-ის პრეზიდენტმა, დონალდ ტრამპმა ევროპისგან უფრო მკაცრი ზომები მოითხოვა.
