უკრაინის პრეზიდენტი ვოლოდიმირ ზელენსკი რუსეთის მიერ გასულ ღამეს უკრაინაზე მასშტაბურ თავდასხმას სოციალურ ქსელში ეხმიანება
„ასეთი მკვლელობები ახლა, როცა დიდი ხანია, შეიძლებოდა დაწყებულიყო რეალური დიპლომატია, არის შეგნებული დანაშაული და ომის გაჭიანურება. ვაშინგტონში არაერთხელ ითქვა, რომ საუბარზე უარის შემთხვევაში სანქციები იქნება. ჩვენ უნდა განვახორციელოთ ყველაფერი, რაზეც პარიზში შევთანხმდით“, - ამბობს ზელესნკი
მისი განცხადებით, ღამიდან რუსული დარტყმების შედეგების სალიკვიდაციო სამუშაოები ამ დრომდე გრძელდება.
„800-ზე მეტი დრონი, 13 რაკეტა, მათაგან ოთხი ბალისტიკური. წინასწარი ინფორმაციით, რამდენიმე დრონმა გადაკვეთა უკრაინისა და ბელარუსის საზღვარი“, - აღნიშნა მან.
ამასთან, ზელენსკიმ აღნიშნა, რომ კიევში ჩვეულებრივი საცხოვრებელი შენობები დაინგრა. ერთ-ერთ მათგანში მეოთხე და მერვე სართულებს შორის ჭერი ჩაინგრა.
„ამ დროისთვის ჩვენთვის ცნობილია ორი დაღუპულის ადამიანის, რომელთაგან ერთი ბავშვია. ვუსამძიმრებ ყველა ნათესავსა და მეგობარს“, - აღნიშნა ზელენსკიმ და დასძინა, რომ მხოლოდ დედაქალაქში ათობით დაშავებულია.
გარდა ამისა, მან აღნიშნა, რომ უკრაინის მინისტრთა კაბინეტის შენობა დაზიანდა - ხანძარი ზედა სართულებზე გაჩნდა.
„ზაპოროჟიეში 20-ზე მეტი სახლი და საბავშვო ბაღი დაზიანდა. კრივი რიჰში საწყობები განადგურდა, სუმის ოლქის საფონოვკაში და ჩერნიჰივის ოლქში კი ადამიანები დაიღუპნენ. ოდესაში მრავალსართულიან შენობაზე დარტყმა განხორციელდა. გასული დღის განმავლობაში მრავალი რეგიონი დაზარალდა. სადაც საჭიროა, ჩვენი სამსახურები მუშაობენ“, - თქვა პრეზიდენტმა.
ზელენსკიმ ხაზგასმით აღნიშნა: „ასეთი მკვლელობები ახლა, როცა დიდი ხანია, შეიძლებოდა დაწყებულიყო რეალური დიპლომატია, არის შეგნებული დანაშაული და ომის გაჭიანურება. ვაშინგტონში არაერთხელ ითქვა, რომ საუბარზე უარის შემთხვევაში სანქციები იქნება. ჩვენ უნდა განვახორციელოთ ყველაფერი, რაზეც პარიზში შევთანხმდით. ჩვენ ასევე ვიმედოვნებთ, რომ ჩვენი საჰაერო თავდაცვის გასაძლიერებლად ყველა შეთანხმების შესრულებაზე ვიმუშავებთ. თითოეული დამატებითი სისტემა მშვიდობიან მოსახლეობას ამ ამაზრზენი დარტყმებისგან იხსნის.“
მან აღნიშნა, რომ მშვიდობას „შეუძლია კრემლის დამნაშავეები აიძულოს, შეწყვიტონ მკვლელობები, საჭიროა მხოლოდ პოლიტიკური ნება“.
ამავდროულად, კიევის საქალაქო სამხედრო ადმინისტრაციის უფროსმა, ტიმურ ტკაჩენკომ, განაცხადა, რომ დილის 10:00 საათის მონაცემებით, კიევზე რუსული თავდასხმის შედეგად დასტურდება ინფორმაცია 20 დაშავებულისა და ორი დაღუპულის შესახებ.
