უკრაინის პრეზიდენტი ვოლოდიმირ ზელენსკი პარიზში ჩავიდა, საფრანგეთის პრეზიდენტ ემანუელ მაკრონთან შესახვედრად და „მსრველთა კოალიციის“ სამიტში მონაწილეობის მისაღებად.
ელისეის სასახლეში შეხვედრის დაწყებამდე საფრანგეთისა და უკრაინის პრეზიდენტებმა, ემანუელ მაკრონმა და ვოლოდიმირ ზელენსკიმ ერთობლივი პრესკონფერენცია გამართეს.
როგორც ზელენსკიმ აღნიშნა, ეს მისი მერვე ვიზიტია პარიზში.
„დღეს ჩვენ გვექნება ორმხრივი შეხვედრა, ჩვენი გუნდების შეხვედრა. ხვალ ჩვენ გვექნება „მსურველთა კოალიციის“ შეხვედრა, რომლის შედეგიც - არ ვიცი, რომელ დღეს მოხდება - უკრაინის უსაფრთხოების გარანტიები იქნება“, - განაცხადა ზელენსკიმ.
თავის მხრივ, საფრანგეთის პრეზიდენტმა განაცხადა, რომ „მსურველთა კოალიციის“ სამიტზე ისინი ვაშინგტონში აშშ-ის ხელმძღვანელების შეხვედრის დროს შემუშავებული შეთანხმებების გაფორმებას გეგმავენ.
„ჩვენ, ევროპელები, მზად ვართ, უკრაინას გარანტიები მივცეთ იმავე დღეს, როდესაც სამშვიდობო შეთანხმება გაფორმდება“, - განაცხადა მაკრონმა.
ცნობების თანახმად, ხუთშაბათს პარიზში საფრანგეთისა და ბრიტანეთის თანათავმჯდომარეობით „მსურველთა კოალიციის“ შეხვედრაზე დამსწრე ევროპელი ლიდერები მოლაპარაკებების შემდეგ აშშ-ის პრეზიდენტ დონალდ ტრამპს ტელეფონით გაესუბრებიან.
