გიორგი გახარიამ ჩამოიხსნა ნიღაბი, ის თავის დროზე დასცინოდა პრეზიდენტ სააკაშვილს, აბა, თუ შეძლებს, ჩამოვიდესო. ახლა თვითონ მხდალი გაიპარა და იმალება ბერლინში, – ამის შესახებ „ნაციონალური მოძრაობის“ წევრმა, გია ბარამიძემ განაცხადა.
„ეს ყველაფერი მიუთითებს, რომ ეს ადამიანი არ არის პატრიოტი პოლიტიკური ლიდერი, მას არ აქვს იმის სიმამაცე, რა სიმამაცეც გამოავლინა თავის დროზე პირველად პრეზიდენტმა სააკაშვილმა და მიუხედავად იმისა, რომ ბინადრობის უფლება კი არა, უკრაინაში ერთ-ერთ უმაღლეს თანამდებობაზე იმყოფებოდა, ძალიან დაფასებული, ეხმარებოდა რა უკრაინას რეფორმების განხორციელებაში, რაც ასე მნიშვნელოვანია რუსეთის აგრესიის წინააღმდეგ ბრძოლისთვის და იყო ცივილიზებული სამყაროს ბოროტებასთან ბრძოლის წინა ხაზზე, მაინც ჩამოვიდა საქართველოში, იმ მძიმე გზით, რასაც მასხრად იგდებენ ეს მოღალატეთა რეჟიმის წარმომადგენლები და რუსი პროპაგანდისტები. სააკაშვილი ჩამოვიდა, რათა ყოფილიყო ქართველ ხალხთან ერთად, დახმარებოდა მათ, მშვიდობიანად მოეცილებინათ ეს კრემლის მეხუთე კოლონა, პრაქტიკულად თავისი ფეხით, ასე ღიმილიანად ჩაჯდა ციხეში. ამას მოჰყვა შემდგომ პროცესები ამ რეჟიმის წინააღმდეგ და დღეს პრაქტიკულად ყველა ლიდერი ზის რეჟიმის ციხეში და არის პოლიტიკური პატიმარი, მზია ამაღლობელთან, მასწავლებლებთან და იმ ახალგაზრდებთან ერთად, რომლებიც სხვადასხვა პოლიტიკური გემოვნების არიან, სხვადასხვა სამოქალაქო პოზიციის არიან, მაგრამ არიან საქართველოს გულწრფელი პატრიოტები და მათთვის მიუღებელია საქართველოში რუსეთის მეხუთე კოლონის და მოღალატეთა, კრიმინალთა ბანდის ბოგინი. აქედან გამომდინარე, მიდის ეს ბრძოლა და მათი პოლიტიკური პატიმრობა ამის ერთ-ერთი გამოხატულებაა“, – განაცხადა ბარამიძემ.
ბარამიძის თქმით, გახარიას სურს, რომ სხვა იყოს მის მაგივრად საქართველოში და სხვა ებრძოლოს მოღალატეებსა და კრიმინალთა რეჟიმს.
„ვხედავთ კარგად, ისედაც ნათელი იყო და ახლა თვითონვე აღიარა, ჩამოიხსნა ნიღაბი, რომ გახარია სულ სხვა აზრებით არის, სულ სხვა შეხედულებებით არის და სულ სხვა მიზნით ლაპარაკობდა იმას, რასაც ადრე ლაპარაკობდა და ვხედავთ, რომ მას არანაირი ამის უნარი არ გააჩნია. ამას ხაზგასმით იმიტომ ვამბობ, რომ ის თავის დროზე დასცინოდა პრეზიდენტ სააკაშვილს, აბა, თუ შეძლებს, ჩამოვიდესო. ახლა თვითონ მხდალი გაიპარა და იმალება ბერლინში და უნდა, რომ სხვა იყოს მის მაგივრად საქართველოში და სხვა ებრძოლოს ამ მოღალატეებსა და კრიმინალთა რეჟიმს. მასთან დაკავშირებით ყველაფერი ნათელია, ვფიქრობ, ვინც ვერ ხვდებოდა, ახლა ყველასთვის, ვისაც რამეს გაგება უნდა, ყველაფერი ნათელია. ამიტომ, უნდა იყოს შესაბამისი რეაგირება ქართული საზოგადოებისა და პოლიტიკური საზოგადოებისა, მე არ ვამბობ, რომ დიდი დრო უნდა დავუთმოთ ამ ადამიანზე საუბარს და მედიის თუ სხვა რესურსი წავიღოთ, მაგრამ ყველაფერს აქვს თავისი დრო და ყველაფერს უნდა დაერქვას სახელი. ჩვენი ბრძოლა პირველ ყოვლისა ამ რეჟიმის წინააღმდეგ უნდა იყოს სიმართლით და ვინც ამ რეჟიმს ხელს უწყობს, ვინც მასთან კოლაბორაციაშია, დანაშაულებრივ კავშირშია და ვინც მზად არის, გაყიდოს პრინციპები და ქართული საზოგადოების ბრძოლას ზურგი აქციოს და უღალატოს ჩვენი ქვეყნის ინტერესებს, შედის რა თანამშრომლობაში ამ მოღალატე კრიმინალ რეჟიმთან, ბუნებრივია, მასაც თავისი ადგილი უნდა მიეჩინოს საქართველოს პოლიტიკურ სარბიელზე. საზოგადოებამ უნდა იცოდეს, ვინ ვინ არის“, – განაცხადა ბარამიძემ.
შეგახსენებთ, პარტია „გახარია საქართველოსთვის“ ლიდერმა, გიორგი გახარიამ დაადასტურა, რომ გერმანიაში ბინადრობის უფლება მიიღო.
