უკრაინის პრეზიდენტმა ვოლოდიმირ ზელენსკიმ განაცხადა, რომ ორი კვირის წინ აშშ-ის პრეზიდენტმა დონალდ ტრამპმა რუსეთს ორი კვირა მისცა რეალური მოლაპარაკებების დასაწყებად.
„ორი კვირის წინ ვაშინგტონში ითქვა, რომ ამ დროისთვის რუსები მზად უნდა იყვნენ რეალური მოლაპარაკებებისთვის, ლიდერების დონეზე შეხვედრისთვის. უკრაინა, უდავოდ, ამისთვის მზადაა. მაგრამ ერთადერთი, რასაც რუსეთი აკეთებს, არის შემდგომ ომის გაგრძელება. მათგან ყველა სიგნალი სწორედ ამის შესახებაა,“ - განაცხადა ზელენსკიმ.
ზელენსკიმ აღნიშნა, რომ რუსეთის პრეზიდენტი ვლადიმირ პუტინი, რომელიც შანხაის თანამშრომლობის ორგანიზაციის სამიტზე დასასწრებად ოთხი დღით ჩინეთში ჩაფრინდა, „კიდევ ერთხელ შეეცდება თავის დაძვრენას - ეს მისი ნომერ პირველი სპორტია“, - თქვა ზელენსკიმ.
„მსოფლიოში ყველა ამბობდა, რომ ცეცხლი უნდა შეწყვეტილიყო, ყველა დაჟინებით მოითხოვდა ომის დასრულებას. ეს იყო ყველას პოზიცია - ჩინეთის, ჩვენ ამაზე ვისაუბრეთ ინდოეთის პრემიერ-მინისტრთან, ასევე სხვა ლიდერებთან, რომლებიც ახლა იქ არიან სამიტზე - თურქეთი, აზერბაიჯანი, ყაზახეთი, მსოფლიოს თითქმის ყველა დანარჩენიც ომის დასრულების მომხრეა.
დღეს რომის პაპმა პრინციპული განცხადება გააკეთა, მადლობა ამისთვის. ერთადერთი, ვისაც ომი სურს, რუსეთია. ჩვენ ველით, რომ არავინ შეეგუება ომის გაჭიანურებას; ჩვენ ველით მტკიცე პოზიციას აშშ-სგან, ევროპისა და G20-ის ქვეყნებისგან“, - განაცხადა პრეზიდენტმა.
ცნობისათვის, 18 აგვისტოს აშშ-ის პრეზიდენტმა დონალდ ტრამპმა ევროპელ ლიდერებთან აშშ-ში შეხვედრის დროს განაცხადა, რომ „ერთ ან ორ კვირაში“ გახდება ცნობილი, შესაძლებელი იქნება თუ არა რუსეთსა და უკრაინას შორის სამშვიდობო შეთანხმების მიღწევა.
21 აგვისტოს ტრამპმა განაცხადა, რომ უკრაინაში მშვიდობის მიღწევის შესაძლებლობის შეფასებას „ორ კვირაში“ შეძლებდა.
25 აგვისტოს ტრამპმა განაცხადა, რომ რუსეთისთვის შესაძლოა „ძალიან სერიოზული შედეგები“ მოჰყვეს და რომ თუ მომდევნო ორი კვირის განმავლობაში საბრძოლო მოქმედებების დასრულების შესახებ შეთანხმებას ვერ მიაღწევენ, ის „გადამწყვეტ ზომებს მიიღებს“.
Axios-ის ცნობით, ტრამპი უკრაინაში ომის დასრულების მცდელობების შეწყვეტაზე ფიქრობს, მისი გარემოცვის წევრები ევროპას ადანაშაულებენ იმაში, რომ უკრაინა არ არის მზად სამშვიდობო შეთანხმების მისაღწევად მნიშვნელოვანი დათმობებისთვის.
