კრასნოდარის მხარეში, გელენჯიკთან ახლოს, „პუტინის სასახლიდან“ რამდენიმე კილომეტრში უკრაინული დრონის ჩამოვარდნის შედეგად გაჩენილი ხანძარი ჩააქრეს.

ამის შესახებ გამოცემა "მედუზა" კრასნოდარის მხარის გუბერნატორ, ვენიამინ კონდრატიევზე დაყრდნობით იუწყება.

კონდრატიევის თქმით, ხანძრის ჩაქრობას 500-ზე მეტი ადამიანი და ოთხი დღე დასჭირდა.

ხანძრის ჩასაქრობად 100 ერთეული ტექნიკა იყო გამოყენებული, მათ შორის ორი Mi-8 ტიპის ვერტმფრენი.

უკრაინული დრონი 28 აგვისტოს დილით ჩავარდა სოფელ კრინიცასთან. სოფელი იდოკოპასის კონცხიდან, სადაც „პუტინის სასახლე“ მდებარეობს, 10 კილომეტრზე ნაკლები მანძილით არის დაშორებული.

ხანძრის შედეგად, სანაპიროზე 20-ზე მეტი ადამიანი ჩარჩა, რომელთა ევაკუირებაც განხორციელდა.

კრასნოდარის მხარის სანაპიროზე უკრაინული დრონების მიერ განხორციელებული თავდასხმების გახშირების ფონზე, ვლადიმირ პუტინმა სოჭში ფრენები ფაქტობრივად შეწყვიტა.

ის ბოლოს თავის ოფიციალურ რეზიდენციას - „ბოჩაროვ რუჩეის“, 2024 წლის მარტში ეწვია.