ევროკავშირის წევრი ქვეყნების საგარეო საქმეთა მინისტრებმა რუსეთზე შემდგომი სასანქციო ზეწოლის შესაძლო ვარიანტები განიხილეს.
ამის შესახებ ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, კაია კალასმა კოპენჰაგენში ევროკავშირის საგარეო საქმეთა მინისტრების არაფორმალური შეხვედრის შემდეგ დანიის საგარეო საქმეთა მინისტრ ლარს ლოკე რასმუსენთან ერთად გამართულ ერთობლივ პრესკონფერენციაზე ისაუბრა.
„მინისტრებმა განიხილეს სანქციების შემდეგი პაკეტის შესაძლო საფუძვლები. ვარიანტებს შორისაა რუსეთის ომის მხარდამჭერების წინააღმდეგ მეორადი სანქციები, ასევე რუსული პროდუქციის იმპორტის აკრძალვები და ტარიფები“, - განაცხადა კალასმა.
კალასის თქმით, ასევე უნდა გაძლიერდეს ძალისხმევა რუსული „ჩრდილოვანი ფლოტის“ წინააღმდეგ.
„მე ვთხოვე წევრ სახელმწიფოებს, მომავალ კვირას წარადგინონ წინადადებები. მიზანი რუსეთზე მაქსიმალური ზეწოლის განხორციელებაა. რა თქმა უნდა, ახალი ქმედებები უფრო ძლიერი იქნება, თუ მათ მხარს დაუჭერენ ჩვენი პარტნიორები, მათ შორის ტრანსატლანტიკური,“ - განაცხადა კალასმა.
მისივე თქმით, მინისტრებმა ასევე განიხილეს უკრაინის თავდაცვისა და რეკონსტრუქციისთვის გაყინული რუსული აქტივების გამოყენების საკითხი.
„ეს იყო ძალიან კარგი და შინაარსიანი განხილვა. ეს გვჭირდებოდა ყველა მხარის ყველა არგუმენტის მოსასმენად, საკითხის არსის რეალურად განსახილველად და ეს დისკუსია გაგრძელდება“, - აღნიშნა კალასმა.
კალასმა აღნიშნა, რომ მინისტრებმა ხაზი გაუსვეს უკრაინის დაფინანსების დეფიციტის მოგვარების და რუსეთის სამხედრო დანაკარგებისთვის პასუხისგების დაკისრების აუცილებლობას.
ამ მიზნის მისაღწევად აუცილებელია ყველა შესაძლო გზის შესწავლა, პოტენციური რისკების მინიმუმამდე დაყვანით.
„მინდა ხაზგასმით აღვნიშნო, რომ ფინანსურმა ბაზრებმა რეაგირება არ მოახდინეს, როდესაც ჩვენ აქტივები გავყინეთ. ფინანსური ბაზრები ჯერ კიდევ მშვიდი იყო, როდესაც ეს საკითხი განვიხილეთ. რისკები არსებობს, მაგრამ დარწმუნებული ვარ, რომ ჩვენ შევძლებთ მათ შემცირებას,“ - განაცხადა კალასმა.
პრესკონფერენციის დროს მან ასევე განაცხადა, რომ მინისტრებს არ ჰქონდათ საკმარისი დრო დღის წესრიგში არსებული მესამე მთავარი საკითხის - საგარეო პოლიტიკის საკითხებთან დაკავშირებით გადაწყვეტილების მიღების მექანიზმის შესაძლო ცვლილების - განსახილველად.
საუბარია გარკვეული გადაწყვეტილებების მიღების შესაძლებლობაზე ევროკავშირის წევრების უმრავლესობის მიერ სრული კონსენსუსის გარეშე, განსაკუთრებით მაშინ, როდესაც ერთი ქვეყანა არ ავლენს კონსტრუქციულ პოზიციას და აფერხებს გადაწყვეტილების მიღების პროცესს ევროკავშირის დონეზე.
