რუსეთი უკრაინის წინააღმდეგ ომის დასრულებას არ აპირებს. აღნიშნული განცხადება რუსეთის ფედერაციის გენერალური შტაბის უფროსმა ვალერი გერასიმოვმა გააკეთა.
„ჯარების (ძალების) გაერთიანებული ჯგუფის მიერ სპეციალური სამხედრო ოპერაციის ამოცანების შესრულება შეტევითი მოქმედებების განხორციელებით გაგრძელდება. დღეს ჩვენ დავაზუსტებთ შემოდგომის პერიოდისთვის რაიონებში განლაგებული სამხედრო ჯგუფების ამოცანებს... სტრატეგიული ინიციატივა… მთლიანად რუსეთის შეიარაღებული ძალების ხელშია“, - განაცხადა გენერალური შტაბის უფროსმა.
მისი თქმით, ამჟამად რუსული არმია აკონტროლებს ლუჰანსკის ტერიტორიის 99.7%-ს, დონეცკის ტერიტორიის 79%-ს, ზაპოროჟიეს 74%-ს და ხერსონის ოლქის 76%-ს.
გერასიმოვის მტკიცებით, 28 და 30 აგვისტოს უკრაინაზე განხორციელებული მასიური დარტყმები, რომელთა შედეგადაც კიევში მრავალსართულიანი საცხოვრებელი კორპუსის სადარბაზო დაინგრა და 25 ადამიანი (მათ შორის ოთხი ბავშვი) დაიღუპა, ასევე სხვა რეგიონებში სამოქალაქო ინფრასტრუქტურა დაზიანდა, „სამხედრო-სამრეწველო კომპლექსთან დაკავშირებული საწარმოების“ წინააღმდეგ განხორციელდა.
მედიის ცნობით, საერთო ჯამში, რუსეთის არმია უკრაინის ტერიტორიის დაახლოებით 20%-ს აკონტროლებს, თუმცა კონტროლის დამყარება უკრაინაში შეჭრის პირველ კვირებში მოხდა.
ომის ბოლო 1010 დღის განმავლობაში რუსეთმა უკრაინის ტერიტორიის 5842 კმ², ანუ ქვეყნის ფართობის 0.97% დაიკავა.
რუსეთის შეტევას კატასტროფული დანაკარგები ახლავს თან. ვაშინგტონში დაფუძნებული სტრატეგიული და საერთაშორისო კვლევების ცენტრი (CSIS) ვარაუდობს, რომ რუსეთის არმიამ შეჭრის შემდეგ დაახლოებით 1 მილიონი ადამიანი დაკარგა, მათ შორის 250 000 დაღუპული და 400 000 დასახიჩრებულია. მსგავს მონაცემებს ავრცელებს ბრიტანული დაზვერვაც.
Meduza-სა და Mediazona-ს ერთობლივი კვლევის თანახმად, 2025 წლის აგვისტოს ბოლოსთვის უკრაინაში 220 ათასი რუსი ჯარისკაცი დაიღუპა.
