რუსეთის ცენტრალური ბანკის აქტივები, რომლებიც გაყინულია ევროკავშირის ტერიტორიაზე ცეცხლის შეწყვეტის ან სამშვიდობო შეთანხმების ხელმოწერის შემდეგ, არ შეიძლება დაბრუნდეს რუსეთის ფედერაციაში, ვიდრე ის არ გადაუხდის რეპარაციებს უკრაინას. ამის შესახებ ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, კაია კალასმა ჟურნალისტებს კოპენჰაგენში, ევროკავშირის საგარეო საქმეთა მინისტრების არაფორმალური შეხვედრის დაწყების წინ განუცხადა.
„ჩვენ ვხედავთ, რომ რუსეთი მშვიდობისკენ არ ისწრაფვის, იმის მიუხედავად, რომ დიდი დიპლომატიური ძალისხმევა იხარჯება ზელენსკის და რუსეთის მოლაპარაკებების მაგიდასთან მისაყვანად. ამ კონტექსტში, რადგან ეს საკითხი მუდმივად ჩნდება, ჩვენ გვექნება დეტალური განხილვა გაყინული აქტივების საკითხზე“, - განაცხადა კალასმა.
მან დასძინა, რომ რუსეთის გაყინულ აქტივებთან დაკავშირებით „არსებობს გარკვეული მგრძნობიარე ასპექტები“, მაგრამ „ჩვენ ნამდვილად გვჭირდება ამის შესახებ გონივრული განხილვა“, რათა გვქონდეს სიტუაციიდან „გამოსვლის სტრატეგია“.
„ჩვენ ვერც კი წარმოგვიდგენია, რომ ცეცხლის შეწყვეტის ან სამშვიდობო შეთანხმების შემთხვევაში ეს აქტივები რუსეთს დაუბრუნდება, თუ ის რეპარაციებს არ გადაიხდის“, - ხაზგასმით აღნიშნა ევროკავშირის უმაღლესმა წარმომადგენელმა.
