საფრანგეთის პრეზიდენტი ემანუელ მაკრონი მიიჩნევს, რომ თუ რუსეთის პრეზიდენტი ვლადიმირ პუტინი კვლავაც თავს აარიდებს უკრაინის პრეზიდენტთან შეხვედრას, რაზეც ის ტრამპთან სამიტის დროს დათანხმდა, ამერიკის პრეზიდენტმა ეს რეაგირების გარეშე არ უნდა დატოვოს.
ამის შესახებ ემანუელ მაკრონმა გერმანიის კანცლერთან ერთობლივ პრესკონფერენციაზე რუსეთის პრეზიდენტზე საუბრისას განაცხადა.
მაკრონმა გაიხსენა, რომ ალასკაში გამართული სამიტის დროს - 10 დღეზე მეტი ხნის წინ - პუტინმა ტრამპს უთხრა, რომ თანახმა იყო ზელენსკისთან შეხვედრაზე, რის შემდეგაც მოსკოვმა ახსნა-განმარტებების მოყვანა დაიწყო, თუ რატომ არ იყვნენ ისინი ამისთვის მზად.
მაკრონმა აღნიშნა, რომ თუ შეხვედრასთან დაკავშირებით ორშაბათამდე, 1-ელ სექტემბრამდე შეთანხმება არ იქნება მიღწეული, „ეს ნიშნავს, რომ პრეზიდენტმა პუტინმა პრეზიდენტი ტრამპი მოატყუა (...) და ეს უპასუხოდ არ უნდა დარჩეს“.
„ჩვენ ორივე ვესაუბრებით პრეზიდენტ ტრამპს... და თუ მომავალ კვირას მოგვიწევს დავასკვნათ, რომ თვეების განმავლობაში შეუსრულებელი დაპირებების შემდეგ, კვლავ არაფერი მოხდება, ჩვენ ძალიან ნათლად მოვუწოდებთ პირველადი და მეორადი სანქციების გამოყენებისკენ“, - თქვა მაკრონმა.
ასევე, საფრანგეთის პრეზიდენტმა განაცხადა, რომ პუტინის მიმართ გამოთქმული სიტყვები - „მტაცებელი“ და „კაციჭამია“, გამართლებულად მიაჩნია.
„როდესაც ვამბობთ, რომ ევროპის კართან კაციჭამიაა, სწორედ ამას გრძნობენ ძალიან ღრმად ქართველები 2008 წლის შემდეგ, უკრაინელები და მრავალი სხვა ერი. ეს არის ადამიანი, რომელმაც გადაწყვიტა ავტორიტარული გზით წასვლა და იმპერიალიზმის თავს მოხვევა საერთაშორისო საზღვრების შეცვლისთვის“, – განაცხადა საფრანგეთის პრეზიდენტმა.
