უკრაინის უსაფრთხოების საუკეთესო გარანტი ევროკავშირსა და ნატო-ში წევრობაა. ამის შესახებ უმაღლესი რადას თავმჯდომარემ რუსლან სტეფანჩუკმა განაცხადა.
„შევხვდი რუმინეთის პარლამენტის დელეგაციას... განვიხილეთ სამშვიდობო პროცესი და აგრესორზე ერთობლივი ზეწოლის მნიშვნელობა.
ხაზიგაესვა, რომ მშვიდობა უნდა იყოს სამართლიანი და ხანგრძლივი, უკრაინის ტერიტორიების ყოველგვარი დათმობის გარეშე... ასევე ყურადღება გავამახვილეთ უკრაინის ევროპულ და ევროატლანტიკურ ინტეგრაციაზე. ევროკავშირსა და ნატო-ში წევრობა ჩვენი სტრატეგიული მიზანი და უსაფრთხოების საუკეთესო გარანტიაა“, - დაწერა სტეფანჩუკმა Facebook-ზე.
მისი თქმით, ყურადღება გამახვილდა ყირიმის საერთაშორისო პლატფორმის ფარგლებში თანამშრომლობაზე, სტოკჰოლმში მეოთხე საპარლამენტო სამიტისთვის მომზადებასა და პარლამენტთაშორისი დიალოგის გაძლიერებაზე, კერძოდ, უკრაინა-რუმინეთი-მოლდოვის ფორმატში.
„ასევე, ჩვენ ჰუმანიტარულ საკითხებს შევეხეთ. მე ხაზი გავუსვი 1932-1933 წლების გოლოდომორის უკრაინელი ხალხის გენოციდად აღიარების მნიშვნელობას, ასევე რუმინეთში მცხოვრები უკრაინელი ბავშვების მშობლიურ ენაზე განათლების მიღების უფლების უზრუნველყოფის აუცილებლობას“, - აღნიშნა სტეფანჩუკმა.
მან ასევე ხაზი გაუსვა, რომ შეხვედრის დროს ცალ-ცალკე განიხილეს უკრაინისა და რუმინეთის სანქციების პოლიტიკის კოორდინაცია, რომელიც მიზნად ისახავს რუსეთის სამხედრო შესაძლებლობების შემცირებას.
