გერმანიის კანცლერმა ფრიდრიხ მერცმა განაცხადა, რომ უკრაინაში ცეცხლის შეწყვეტა „სერიოზული მოლაპარაკებების“ დასაწყებად აუცილებელია.
მისი თქმით, უცნაურია მაღალი დონის მოლაპარაკებების გამართვა მაშინ, როდესაც საბრძოლო მოქმედებები მიმდინარეობს.
„ბატონო ტრამპ, ახლა რთული მოლაპარაკებები იქნება, ჩვენ რუსეთზე ზეწოლა გვჭირდება, შემდეგ შეხვედრამდე ზავი გვჭირდება“, - თქვა მან.
ტრამპმა უპასუხა, რომ პირველ რიგში, მათ რუსეთის პრეზიდენტ ვლადიმiრ პუტინსა და უკრაინის ლიდერ ვოლოდიმირ ზელენსკის საუბრის საშუალება უნდა მისცენ და შემდეგ ნახონ, რა მოხდება.
„დიახ, ჩვენ ამას პრეზიდენტთან განვიხილავთ და ვნახავთ, როგორ შეგვიძლია ამის მიღწევა.
თუ ცეცხლის შეწყვეტას მივაღწევთ, შესანიშნავია. თუ არა, მაშინ ბევრი სხვა საკითხი გვაქვს განსახილველი“, - თქვა ტრამპმა.
მან გაიხსენა, რომ მისი მონაწილეობით რამდენიმე კონფლიქტი წინასწარი ცეცხლის შეწყვეტის გარეშე დასრულდა.
საფრანგეთის პრეზიდენტმა ემანუელ მაკრონმა მხარი დაუჭირა უკრაინაში ცეცხლის შეწყვეტის გამოცხადების იდეას ლიდერების სამმხრივ შეხვედრამდე.
მან თქვა, რომ უკრაინას უსაფრთხოების გარანტიისთვის ძლიერი არმია უნდა ჰყავდეს და ევროპა იმედოვნებს, რომ მშვიდობის მისაღწევად ტრამპზე დაყრდნობა შეუძლია.
