ყოველი სანქცია, რომელიც ძალაში იყო, როცა დონალდ ტრამპმა თანამდებობა დაიკავა, ადგილზეა და სანქციების გავლენაც ასევე ძალაში რჩება. როდესაც რუსები ალასკაზე დაფრინდნენ საწვავის შესავსებად, მათ მოუწიათ, გადახდა ნაღდი ფულით შემოეთავაზებინათ, რადგან მათ ჩვენი საბანკო სისტემის გამოყენება არ შეუძლიათ, - ამის შესახებ აშშ-ის სახელმწიფო მდივანმა, მარკო რუბიომ NBC News-ის ეთერში განაცხადა.
მისი თქმით, რუსები სანქციების შედეგებს ყოველდღე აწყდებიან.
რუბიო არ ფიქრობს, რომ რუსეთის წინააღმდეგ ახალი სანქციები აიძულებს მას ცეცხლის შეწყვეტაზე დათანხმდეს. „ისინი ისედაც ძალიან მკაცრი სანქციების ქვეშ არიან“, - განაცხადა აშშ-ის სახელმწიფო მდივანმა.
მან ხაზგასმით აღნიშნა, რომ არ არსებობს არანაირი მტკიცებულება იმისა, რომ ახალი სანქციები ეფექტური იქნება და რუსეთს აიძულებს დაუყოვნებლივ დაყაროს იარაღი, რადგან შეზღუდვები ძალაში თვეების ან თუნდაც წლების შემდეგ შევა.
„ეს არ ნიშნავს, რომ სანქციები უადგილოა, არამედ ამას ომის შედეგი არ შეუცვლია. ჩვენი აზრით, მნიშვნელოვანი ისაა, თუ როგორ ვამთავრებთ ამ ომს“, - არნიშნა მარკო რუბიომ.
მისი თქმით, ვაშინგტონის მიერ ახალი სანქციების გამოცხადება სამშვიდობო მოლაპარაკებებს შეაფერხებს
„ამ ომის დასასრულებლად საჭიროა, რომ რუსებთან ლაპარაკი შეგეძლოს. რამდენადაც ამოსწონს ეს ხალხს, რამდენადაც უსიამოვნოდ მიიჩნევს ამას ხალხი, ომის დასრულების ერთადერთი გზაა, რომ რუსეთი დაითანხმო, ასევე უკრაინელებიც, მაგრამ რუსები უნდა დაითანხმო სამშვიდობო შეთანხმებაზე და იმ წუთსვე, როცა ახალ სანქციებს გამოაცხადებ, მაგიდასთან მათი მოყვანის შენი უნარი, ჩვენი უნარი სერიოზულად შესუსტდება - ეს მომენტი შესაძლოა, მაინც დადგეს, მაგრამ როცა დადგება შენი გზავნილია, რომ ამ დროისთვის მშვიდობის დამყარების შესაძლებლობა არ არსებობს," - განაცხადა რუბიომ.
