აშშ-ის პრეზიდენტ დონალდ ტრამპს ალასკისკენ მიმავალ საპრეზიდენტო თვითმფრინავის ბორტზე ჟურნალისტებმა უკრაინაზე რუსეთის მიერ განხორციელებულ დარტყმებზე კომენტარის გაკეთება სთხოვეს.
აშშ-ის პრეზიდენტის თქმით, პუტინი, სავარაუდოდ, მოლაპარაკებების წინ საკუთარი პოზიციების განმტკიცებას ცდილობს.
„ის სცენის დადგმას ცდილობს. მისი გაგებით, ეს მათ უკეთესი გარიგების მიღწევაში დაეხმარება. სინამდვილეში, ეს მათ ზიანს აყენებს. მაგრამ ის ფიქრობს, რომ თუ მკვლელობას გააგრძელებენ, ეს მათ უკეთესი გარიგების მიღწევაში დაეხმარება. შესაძლოა, ეს მხოლოდ მისი გენების ბრალია. მაგრამ ის ფიქრობს, რომ ეს მას მოლაპარაკებებში ძალაუფლებას აძლევს. ვფიქრობ, ეს მას აზიანებს, მაგრამ ამაზე მოგვიანებით ვისაუბრებ“, - თქვა ტრამპმა.
ამავდროულად, აშშ-ის პრეზიდენტმა გარკვეული ოპტიმიზმი გამოთქვა პუტინთან დღევანდელ მოლაპარაკებებთან დაკავშირებით.
„მე ვფიქრობ, რომ ამისგან რაღაც გამოვა. შევნიშნე, რომ მას რუსეთიდან ბევრი ბიზნესმენი ჩამოჰყავს. და ეს კარგია. მომწონს ეს, რადგან მათ ბიზნესის კეთება სურთ, მაგრამ ისინი ბიზნესს ვერ დაიწყებენ მანამდე, ვიდრე ამ ომს არ დავასრულებთ“, - თქვა ტრამპმა.
ამავდროულად, ამერიკის პრეზიდენტმა აღნიშნა, რომ რუსეთის ეკონომიკა რთულ პერიოდს გადის, ამიტომ თუ მოლაპარაკებები შედეგს არ გამოიღებს, რუსეთს კიდევ უფრო დიდი პრობლემები შეექმნება.
„ძალიან სერიოზული ეკონომიკური შედეგები მოჰყვება. ამას ჩემი ჯანმრთელობისთვის არ ვაკეთებ, ეს გასაგებია? ამას ბევრი სიცოცხლის გადასარჩენად ვაკეთებ. ამას ბევრი სიცოცხლის გადასარჩენად ვაკეთებ. შესაბამისად, ძალიან სერიოზული ეკონომიკური შედეგები იქნება“, - განაცხადა ტრამპმა.
