გერმანიის კანცლერმა ფრიდრიხ მერცმა რუსეთის პრეზიდენტ ვლადიმირ პუტინს მოუწოდა, სერიოზულად მოეკიდოს აშშ-ის პრეზიდენტის, დონალდ ტრამპის წინადადებას უკრაინასთან დაკავშირებით მოლაპარაკებების შესახებ.
„რუსეთს დღეს აქვს შესაძლებლობა, დათანხმდეს ცეცხლის შეწყვეტას და შეწყვიტოს საომარი მოქმედებები“, - განაცხადა მერცმა ოფიციალურ განცხადებაში.
მერცის თქმით, პარასკევს, 15 აგვისტოს, ალასკაში ტრამპსა და პუტინს შორის შეხვედრის მთავარი მიზანი სამიტია, რომელშიც უკრაინის პრეზიდენტი ვოლოდიმირ ზელენსკიც მიიღებს მონაწილეობას.
„ჩვენ ველით, რომ პრეზიდენტი პუტინი სერიოზულად მიიღებს პრეზიდენტ ტრამპის წინადადებას მოლაპარაკებების შესახებ და ალასკაში შეხვედრის შემდეგ უკრაინასთან მოლაპარაკებებს პირობების გარეშე დაიწყებს“, - ხაზგასმით აღნიშნა გერმანიის კანცლერმა.
მისივე თქმით, კიევსა და მოსკოვს შორის პოტენციური მოლაპარაკებების შედეგი უნდა იყოს ცეცხლის შეწყვეტის შესახებ შეთანხმება, რომლის ფარგლებშიც უკრაინა უსაფრთხოების საიმედო გარანტიებს მიიღებს.
მერცის თქმით, ტერიტორიული საკითხების მოგვარება მხოლოდ უკრაინელების თანხმობით არის შესაძლებელი.
„ეს გზავნილები ნათლად და ერთსულოვნად გადავეცით პრეზიდენტ ტრამპს ანკორიჯში მისი ვიზიტის წინ. მე მასთან კონტაქტის შენარჩუნებას ვაგრძელებ. პრეზიდენტ ტრამპს შეუძლია მშვიდობის დამყარებისკენ მნიშვნელოვანი ნაბიჯის გადადგმა“, - განაცხადა ფრიდრიხ მერცმა.
