13 აგვისტოს, ონლაინ-შეხვედრაზე, აშშ-ის პრეზიდენტმა დონალდ ტრამპმა ევროპელ და უკრაინელ ლიდერებს განუცხადა, რომ შეერთებული შტატები მზადაა, გარკვეული პირობებით, უკრაინას უსაფრთხოების გარანტიები მისცეს.
ამის შესახებ Politico ინფორმირებულ წყაროებზე დაყრდნობით წერს.
თუმცა, გამოცემის წყაროების ცნობით, ასეთი გარანტიები ნატო-ს ფარგლებში ვერ გაიცემა.
გამოცემის სამივე თანამოსაუბრემ - ევროპელმა დიპლომატმა, ბრიტანელმა ოფიციალურმა პირმა და ონლაინ-შეხვედრის შესახებ ინფორმირებულმა პირმა - განაცხადა, რომ შეერთებული შტატები მზადაა, ცეცხლის შეწყვეტის შემთხვევაში, კიევისთვის რუსეთის შესაძლო აგრესიის შეკავებაში მონაწილეობა მიიღოს.
„ინფორმირებული წყაროს თქმით, ტრამპმა განაცხადა, რომ ასეთ ვალდებულებას მხოლოდ იმ შემთხვევაში აიღებს, თუ ძალისხმევა ნატო-ს ფარგლებში არ განხორციელდება“, - წერს გამოცემა.
თუმცა, Politico-ს წყაროს ცნობით, ტრამპმა არ დააკონკრეტა, თუ რას გულისხმობდა უსაფრთხოების გარანტიებში, მან მხოლოდ უფრო ფართო კონცეფცია განიხილა.
ბრიტანელი ოფიციალური პირის თქმით, ტრამპი ფიქრობს, რომ ამერიკული უსაფრთხოების გარანტიები საბოლოო შეთანხმების ნაწილი უნდა იყოს და მიიჩნევს, რომ შეერთებულ შტატებს ამაში თავისი როლი აქვს შესასრულებელი.
ტრამპის ღიაობა ასეთი გარანტიების მიმართ - რაც როგორც უკრაინის, ასევე ევროპის მთავარი მოთხოვნაა - ხსნის ევროპელი მაღალჩინოსნების ფრთხილ ოპტიმიზმს პარასკევს ტრამპსა და პუტინს შორის ალასკაში დაგეგმილი შეხვედრის წინ.
თუმცა, უსაფრთხოების გარანტიების მიუხედავად, ტრამპმა ნათლად განაცხადა, რომ აშშ არ გააგრძელებს უკრაინისთვის იარაღის პირდაპირ მიწოდებას, თუმცა კიევისთვის გადასაცემ შეიარაღებას ევროპას მიჰყიდის.
