გერმანიის კანცლერ ფრიდრიხ მერცის განცხადებით, ჰამასის მიერ უკიდურესად დასუსტებული ისრაელელი მძევლების ამსახველი ვიდეომასალის გამოქვეყნება იმის დასტურია, თუ რატომ არ უნდა ჰქონდეს ამ დაჯგუფებას რაიმე როლი პალესტინელების პოლიტიკურ მმართველობაში.
მერცმა განაცხადა, რომ იგი აღშფოთებული იყო მძევლების, ევიათარ დავიდის და რომ ბრასლავსკის, კადრებით, რომლებიც ჯერ კიდევ ჰამასის მძევლობაში რჩებიან.
„ჰამასი აწამებს მძევლებს, ატერორებს ისრაელს და ღაზის სექტორის მოსახლეობას ცოცხალ ფარად იყენებს. ეს კადრები აჩვენებს, თუ რატომ არ უნდა ითამაშოს ჰამასმა არანაირი როლი ღაზის სექტორის მომავალში“, - განაცხადა კანცლერმა.
მან ასევე ხაზი გაუსვა, რომ ყველა მძევლის გათავისუფლება იქნება ცეცხლის შეწყვეტის შეთანხმების წინაპირობა და აღნიშნა, რომ ისრაელმა, თავის მხრივ, უნდა უზრუნველყოს რეგიონში ჰუმანიტარული დახმარების ხელმისაწვდომობა.
საფრანგეთის პრეზიდენტმა ემანუელ მაკრონმა ვიდეოჩანაწერს აუტანელი უწოდა და განაცხადა, რომ მომავალი შეთანხმების ფარგლებში, ჰამასი უნდა განიარაღდეს და არ უნდა მიეცეს პალესტინელების ცხოვრებაზე რაიმე ფორმით მმართველობის უფლება.
ჰამასმა ღაზაში ისრაელელი მძევლის, ევიათარ დავიდის ვიდეო გაავრცელა, რომელშიც ჩანს, რომ ის უკიდურესად გამხდარი და დასუსტებულია.
დავიდი ამბობს, რომ არასაკმარის წყალსა და საკვებს იღებს, ძირითადად ოსპსა და ლობიოს ჭამს და რამდენიმე დღის განმავლობაში არაფერი არ უჭამია.
"დღეს 27 ივლისია, შუადღის 12:00 საათია, არ ვიცი რას შევჭამ. რამდენიმე დღის გადაბმით არ მიჭამია.... ძალიან, ძალიან რთულ სიტუაციაში ვარ დიდი ხანია, რამდენიმე თვეა". - ამბობს დავიდი.
ვიდეოს ბოლოს დავიდი გვირაბში საფლავს თხრის და ამბობს, რომ ის შესაძლოა აქ დაასაფლავონ.
სავარაუდოდ, დავიდს სიტყვებს ტერორისტები კარნახობენ, რომლებსაც ის მძევლად ჰყავთ აყვანილი.
რამდენიმე დღით ადრე, 31 ივლისს, კიდევ ერთი მძევლის, რომ ბრასლავკის მსგავსი ვიდეო გავრცელდა.
