ევროკავშირის უმაღლესი წარმომადგენელი საგარეო საკითხებისა და უსაფრთხოების პოლიტიკის საკითხებში კაია კალასი აცხადებს, რომ "ჰამასი უნდა განიარაღდეს და დაასრულოს მმართველობა ღაზაში".
კალასი გამოეხმაურა "ჰამასის" მიერ გამოქვეყნებულ ვიდეოს, სადაც ასახულები არიან მათ ტყვეობაში მყოფი ისრაელელი მძევლები.
კაია კალასმა მკაცრად დაგმო "ეს შემაძრწუნებელი კადრები" და მძევლების დაუყოვნებლივ გათავისუფლება მოითხოვა.
"ისრაელელი მძევლების სურათები შემაძრწუნებელია და აჩვენებს "ჰამასის" ბარბაროსობას. ყველა მძევალი უნდა გათავისუფლდეს დაუყოვნებლივ და უპირობოდ. „ჰამასი“ უნდა განიარაღდეს და დაასრულოს თავისი მმართველობა ღაზაში. ამავდროულად, ფართომასშტაბიანი ჰუმანიტარული დახმარება უნდა მიეწოდოთ მათ, ვისაც სჭირდება“, – წერს კალასი X-ზე.
შეგახსენებთ, "ჰამასი" აცხადებს, რომ არ აპირებს განიარაღებას პალესტინის დამოუკიდებელი სახელმწიფოს შექმნამდე, რომლის დედაქალაქი იქნება იერუსალიმი.
