უკრაინაში რუსეთის სრულმასშტაბიანი შეჭრის დაწყებიდან, სულ მცირე 121 507 სამხედრო მოსამსხურე დაიღუპა, რომელთა ვინაობა „მედიაზონას“ და BBC-ის რუსული ბიუროს ჟურნალისტებმა, მოხალისეთა ჯგუფთან ერთად დაადგინეს.
„მედიაზონის“ ვებგვერდზე გამოქვეყნებული ინფორმაციის თანახმად, დაღულთა ყველაზე დიდი რაოდენობა (5 889 ადამიანი) ბაშკირეთის მაცხოვრებელი იყო, თათრეთის - 5 565, ეკატერინბურგის - 4 377, ჩელიაბინსკის - 3 649.
დაღუპულთა 27.3% (33 152 ადამიანი) მოხალისეები იყვნენ, 14.8% (17 964 ადამიანი) - პატიმრები, ხოლო 11% (13 356) - მობილიზებულები.
ამასთან, უკრაინაში დაიღუპა რუსეთის არმიისა და სხვა უსაფრთხოების სამსახურების 5,432 ოფიცერი, მათ შორის 12 გენერალი.
ჟურნალისტები ხაზს უსვამენ, რომ ომში რუსული არმიის რეალური დანაკარგები უფრო მაღალია, რადგან რუსი ჯარისკაცების გარდაცვალების შესახებ ყველა ცნობა ღია წყაროებში არ ხვდება.
14 ივლისს, აშშ-ის პრეზიდენტ დონალდ ტრამპთან შეხვედრაზე, ნატოს გენერალურმა მდივანმა მარკ რუტემ განაცხადა, რომ მხოლოდ 2025 წლის დასაწყისიდან რუსეთის არმიამ უკრაინაში 100 000 ჯარისკაცი დაკარგა. აპრილში ნატომ 250 000 დაღუპული და 650 000 დაჭრილი რუსის შესახებ ისაუბრა.
უკრაინის შეიარაღებული ძალების გენერალურმა შტაბმა ივნისში განაცხადა, რომ ომის დაწყებიდან რუსეთის დანაკარგებმა 1 მილიონ დაღუპულ და დაჭრილ ადამიანს გადააჭარბა.
3 ივნისს, The New York Times-მა, სტრატეგიული და საერთაშორისო კვლევების ცენტრის (CSIS) კვლევაზე დაყრდნობით, გაავრცელა ინფორმაცია, რომ რუსეთისა და უკრაინის ჯამურმა დანაკარგებმა ომში დაახლოებით 1,4 მილიონი ადამიანი შეადგინა, რომელთაგან დაახლოებით მილიონი რუსეთის მხარეს იყო.
1 აგვისტოს, რუსეთის პრეზიდენტმა ვლადიმერ პუტინმა განაცხადა, რომ უკრაინაში მყოფ რუს სამხედროებს შორის „არც ერთი დანაკარგი არ ყოფილა უშედეგო“, რადგან დაღუპულებმა, „შექმნეს წინსვლის წინაპირობა ადამიანებისთვის, რომლებიც დღეს ქვეყანაში იმყოფებიან“.
