2 აგვისტოს ღამეს, რუსეთის რეგიონში აფეთქებები იყო. თვითმხილველები იუწყებიან დრონებით თავდასხმების და ნავთობგადამამუშავებელ ქარხნებში მასშტაბური ხანძრების, რადიოქარხნებში და სამხედრო აეროდრომის მახლობლად აფეთქებების შესახებ. ამის შესახებ უკრაინული მედია რუსულ Telegram -არხებზე დაყრდნობით იუწყება.
სოციალურ მედიაში გავრცელდა ვიდეოები, სადაც ჩანს, სავარაუდოდ, სამარის რეგიონში, ნოვოკუიბიშევსკის ნავთობგადამამუშავებელ ქარხანაში გაჩენილი მასშტაბური ხანძარი. კადრებში დრონებისა და საჰაერო თავდაცვის სისტემების ხმები ისმის.
სამარის რეგიონის გუბერნატორმა ვიაჩესლავ ფედორიშჩოვმა დაადასტურა უპილოტო თვითმფრინავის დარტყმა ნოვოკუიბიშევსკზე.
„დღეს დილით მტრის უპილოტო საფრენმა აპარატებმა ნოვოკუიბიშევსკში ერთ-ერთ სამრეწველო საწარმოს შეუტიეს. ადგილზე საგანგებო სიტუაციების სამსახურები მუშაობენ“, - დაწერა მან თავის Telegram-არხზე.
მან ასევე განაცხადა, რომ რეგიონში მობილური ინტერნეტის დროებითი შეზღუდვები დაწესდა და სამარის აეროპორტმა ფუნქციონირება შეაჩერა.
დრონები, ასევე დაესხნენ თავს პენზის ოლქის ქალაქ პენზაში მდებარე საწარმოს „ელექტროპრიბორს“. აღნიშნული საწარმო პირდაპირ კავშირშია რუსეთის თავდაცვის სექტორთან.
საწრმო წარმოადგენს სტრატეგიულად მნიშვნელოვან ობიექტს რუსეთის სამხედრო-სამრეწველო კომპლექსისთვის. მისი საქმიანობა მჭიდროდ უკავშირდება ქვეყნის თავდაცვით სექტორსა და სახელმწიფო თავდაცვით შეკვეთებს.
საწარმო სპეციალიზდება შემდეგ სფეროებში:
კავშირის სისტემები — შიფრატორები, დაცული მოდემები, მულტიპლექსორები;
კომუტატორები და ციფრული ქსელების აღჭურვილობა სამხედრო მართვის სისტემებისთვის;
ტექნოლოგიური გადაწყვეტილებები ავიაციისთვის, ჯავშანტექნიკისთვის, გემებისა და კოსმოსური აპარატებისთვის;
კომპლექსური სისტემები კონფიდენციალური ხმოვანი, გრაფიკული და დოკუმენტური მონაცემების გადაცემისთვის.
ასევე თვითმხილველების თქმით, რიაზანის რეგიონში მდებარე დიაგილევოს აეროდრომთან ახლოს ძლიერი აფეთქებები გაისმა.
ქალაქ რიაზანში, სავარაუდოდ, კიდევ ერთი ნავთობგადამამუშავებელი ქარხანა დაბომბეს.
ადგილობრივი Telegram -არხები თვითმხილველების ვიდეოებს აქვეყნებენ, სადაც ხანძარი ჩანს. რეგიონულმა ხელისუფლებამ დაადასტურა ადგილობრივ საწარმოზე დრონით თავდასხმა, თუმცა არ დაუკონკრეტებია, თუ რომელზე.
ლიპეცკისა და ვორონეჟის რეგიონების მაცხოვრებლები ასევე იუწყებიან უპილოტო საფრენი აპარატების თავდასხმებისა და საჰაერო თავდაცვის ოპერაციების შესახებ.
