სააგენტო Reuters ტაილანდის ჯანდაცვის სამინისტროს მონაცემებზე დაყრდნობით, იუწყება, რომ კამბოჯასთან კონფლიქტის დროს სულ მცირე 16 ადამიანი დაიღუპა, რომელთაგან 14 მშვიდობიანი მოქალაქე იყო.

ტაილანდური მხრიდან ორმოცდაექვსი ადამიანი, მათ შორის 15 ჯარისკაცი, დაშავდა. კამბოჯამ დეტალები არ გაუვრცელებია.

24 ივლისის დილით, ტაილანდსა და კამბოჯას შორის აღმოსავლეთ საზღვარზე შეტაკებები დაიწყო. ორივე ქვეყანამ ერთმანეთი  საომარი მოქმედებების დაწყებაში დაადანაშაულა.

კონფლიქტი მას შემდეგ გამწვავდა, რაც ტაილანდმა 23 ივლისს საღამოს კამბოჯიდან თავისი ელჩი გაიწვია და დააანონსა, რომ ბანგკოკში კამბოჯის ელჩს გააძევებს.

ტაილანდის არმიის ცნობით, 24 ივლისს ჰაერში განლაგდა  F-16-ისტიპისექვსი გამანადგურებელი, რომელთაგან ერთ-ერთმა კამბოჯაში სამხედრო სამიზნეზე ზუსტი დარტყმა განახორციელა.

კამბოჯის საგარეო საქმეთა სამინისტრომ ტაილანდის ქმედებებს „უგუნური და სასტიკი სამხედრო აგრესია“ უწოდა.