თურქეთში აშშ-ის ელჩმა, ტომ ბარაკმა, პარასკევს განაცხადა, რომ სირია და ისრაელი ცეცხლის შეწყვეტაზე შეთანხმდნენ. ამის შესახებ CNN ტომ ბარაკის მიერ X-ზე გამოქვეყნებულ პოსტზე დაყრდნობით იუწყება.
ბარაკმა, რომელიც ასევე სირიაში აშშ-ის სპეციალური წარმომადგენელია, განაცხადა, რომ შეთანხმებას მხარი დაუჭირეს თურქეთმა, იორდანიამ და სხვა მეზობელმა ქვეყნებმა.
„მოვუწოდებთ ჩვენს მეგობრებს, ბედუინებსა და სუნიტებს, დადონ იარაღი და სხვა უმცირესობებთან ერთად ააშენონ ახალი და ერთიანი სირიული იდენტობა მშვიდობით და კეთილდღეობით მეზობლებთან ერთად,“ - წერს ბარაკი.
CNN აღნიშნავს, რომ არცერთ მხარეს არ გაუკეთებია კომენტარი შეთანხმების შესახებ.
ზავი გამოცხადდა მას შემდეგ, რაც ისრაელმა ოთხშაბათს სირიაში საჰაერო დარტყმები განახორციელა, რომლებიც, ისრაელის თქმით, მისი რელიგიური უმცირესობების დაცვას ისახავდა მიზნად.
სირიის ადამიანის უფლებათა ობსერვატორიის ცნობით, სირიაში, სუვეიდას პროვინციაში დრუზ მებრძოლებსა და ბედუინთა ტომებს შორის რამდენიმედღიანი სამხედრო დაპირისპირების შედეგად დაღუპულთა რიცხვმა 300-ს გადააჭარბა.
ისრაელის მთავრობამ ადრე განაცხადა, რომ სირიაში დრუზების თემს „პოტენციურ მოკავშირედ“ მიიჩნევს და მის დაცვას გეგმავს.
16 ივლისს, ისრაელმა იერიში მიიტანა სირიის პრეზიდენტის სასახლესა და თავდაცვის სამინისტროს შენობაზე.
17 ივლისს სირიელმა სამხედროებმა სუვეიდიდან გასვლა დაიწყეს. სირიის ჯანდაცვის სამინისტროს ცნობით, დამასკოზე ისრაელის საჰაერო თავდასხმების შედეგად სამი ადამიანი დაიღუპა და 34 დაშავდა.
