გერმანიის საგარეო საქმეთა მინისტრი იოჰან ვადეფული საიდუმლო ვიზიტით ოდესაში იმყოფებოდა.
რუსეთის მიერ უკრაინის წინააღმდეგ მიმდინარე მასობრივი დარტყმების ფონზე, გერმანელ პოლიტიკოსს ოდესაში ვიზიტისას მისი დელეგაციის მხოლოდ მცირე ნაწილი ახლდა თან, რომელიც უსაფრთხოების მიზნით, მასთან ერთად კიევში ერთი დღით ადრე ჩავიდა.
უკრაინის დედაქალაქიდან ვეიდფული ოდესის მიმართულებით მანქანით, ავტოკოლონასთან ერთად ხუთ საათზე მეტხანს მგზავრობდა.
შავი ზღვისპირა ქალაქში ვიზიტი 1-ელ ივლისს შედგა, ანუ ვადეფულის კიევში პირველი ვიზიტიდან მეორე დღეს. ვიზიტის დროს გერმანიის საგარეო საქმეთა მინისტრს თან ახლდა მისი უკრაინელი კოლეგა, ანდრიი სიბიჰა.
ინფორმაცია ვადეფულის ოდესაში ვიზიტის შესახებ მხოლოდ მას შემდეგ გახდა ცნობილი, რაც მან უკრაინა დატოვა და მოლდოვაში გაემგზავრა.
ოდესაში გერმანელი მინისტრი იმყოფებოდა პორტში, რომელიც არაერთხელ გამხდარა რუსული თავდასხმების სამიზნე. იოჰან ვადეფულმა განაცხადა, რომ გერმანიის მთავრობამ უნდა გააგრძელოს უკრაინისთვის საჰაერო თავდაცვის სისტემების ახალი მიწოდების საკითხის განხილვა. კერძოდ, შესაძლოა, საუბარი იყოს სისტემებზე, რომელთა განთავსებაც შესაძლებელია გემებზე საზღვაო მარშრუტების დასაცავად. ვადეფულის თქმით, უკრაინის პარტნიორებმა „კონცენტრირება უნდა მოახდინონ იმაზე, რომ საჰაერო თავდაცვის სფეროშიუზრუნველყოფილი იყოს ყველა შესაძლებლობა“. მან ასევე განაცხადა, რომ აპირებს პარტნიორი ქვეყნები დაარწმუნოს კიევისთვის დამატებითი შეიარაღების სისტემების მიწოდების აუცილებლობაში. გარდა ამისა, მან აღნიშნა, რომ შეერთებულ შტატებთან უკრაინის თავდაცვისადმი ერთგულების შესახებ დიალოგი უნდა გაგრძელდეს.
შეგახსენებთ, ვადეფული უკრაინაში 30 ივნისს ჩავიდა.
