მთელი სითამამით ვამბობ, ყველას ვაფრთხილებ, ხელი არავის წაუცდეს - კორუფცია თითოეულ ჩვენგანს აზიანებს და ქვეყანა მიჰყავს უკან, - ამის შესახებ “ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, მამუკა მდინარაძემ განაცხადა,
მდინარაძე ეკონომიკის მინისტრის ყოფილი მოადგილის, რომეო მიქაუტაძის დაპატიმრებას გამოეხმაურება.
„ჩვენ გვაქვს ამბიცია, რომ ძალიან მალე მსოფლიო სამეულში შევიდეთ კორუფციასთან ბრძოლის ინდექსით. თუკი რომელიმე საჯარო მოხელე, ჩვენი თანაგუნდელი იქნება მხილებული იმაში, რომ მან დანაშაული ჩაიდინა და კანონი იქნება აღსრულებული. ჩვენი მიდგომა არის ერთი, ყველას ვაფრთხილებ მთელი პასუხისმგებლობით, ეს არის გუნდის მიდგომა, აღმასრულებელი, საკანონმდებლო და ყველას შტოსი, დარწმუნებული ვარ, კორუფციასთან ბრძოლაში სასამართლოც თავის პოზიტიურ, კანონის ჩარჩოებში, წვლილს შეიტანს, ამიტომ მთელი სითამამით ვამბობ, ყველას ვაფრთხილებ, ხელი არავის წაუცდეს. თუკი ვინმეს ხელი წაუცდება, სახელმწიფო ამის მიმართ იქნება შეურიგებელი იმიტომ, რომ ეს თითოეულ ჩვენგანს აზიანებს და ქვეყანა მიჰყავს უკან. თუკი რაიმე შემაფერხებელი შეიძლება იყოს, კორუფცია არის ერთ-ერთი მთავარი და თუკი ვინმეს მოუნდება, რომ ხელი მოითბოს, ჩვენ ამის მიმართაც შეურიგებლები ვიქნებით“, - განაცხადა მამუკა მდინარაძემ.
