გარემოს დაცვისა და სოფლის მეურნეობის მინისტრის პირველმა მოადგილე ნინო თანდილაშვილმა, ქალაქ ფოთში გამართულ გარემოს დაცვისა და ბუნებრივი რესურსების კომიტეტის გასვლით სხდომაზე „გარემოსდაცვითი შეფასების კოდექსსა“ და მისგან გამომდინარე კანონპროექტებში შეტანილი ცვლილებები მესამე მოსმენით წარადგინა.
ნინო თანდილაშვილის განცხადებით, კანონპროექტების ძირითადი მიზანი კოდექსით გათვალისწინებული გარემოსდაცვითი შეფასების პროცედურების დახვეწა და პრაქტიკაში გამოვლენილი ხარვეზების გამოსწორებაა. როგორც მინისტრის პირველმა მოადგილემ აღნიშნა, „გარემოსდაცვითი შეფასების კოდექსის“ ამოქმედებიდან დღემდე, კოდექსით გათვალისწინებული ნორმების აღსრულებამ გამოავლინა გარკვეული საკითხები, რომლებიც გადახედვას, დაზუსტებასა და დახვეწას საჭიროებდა.
„წარმოდგენილი კანონპროექტით გათვალისწინებული ცვლილებების მიზანია გარემოზე ზემოქმედების შეფასების ისეთი სისტემის დანერგვა, რომელიც უზრუნველყოფს მაღალი გარემოსდაცვითი სტანდარტების დაცვას, მორგებული იქნება ქვეყანაში მიმდინარე ეკონომიკურ პროცესებს და მიმართული იქნება შესაბამისი ბიზნესოპერაციების გამარტივებისკენ. მნიშვნელოვანია, რომ ცვლილება ადგენს გადაწყვეტილების მიღების უფრო მოქნილ წესს“, - განაცხადა ნინო თანდილაშვილმა.
როგორც კომიტეტის სხდომაზე აღინიშნა, კანონპროექტის მიღების შედეგად დაიხვეწება, გამარტივდება და უფრო ეფექტიანი გახდება კოდექსით გათვალისწინებული სკრინინგის, სკოპინგისა და გზშ-ის პროცედურები, უზრუნველყოფილი იქნება ეკონომიკური საქმიანობების შეუფერხებლად განხორციელება.
აღსანიშნავია, რომ „გარემოსდაცვითი შეფასების კოდექსი“ 2018 წლიდან ამოქმედდა და ერთ-ერთი პირველი საკანონმდებლო აქტი იყო, რომელმაც ეროვნული კანონმდებლობა ევროკავშირის გარემოზე ზემოქმედების და სტრატეგიული შეფასების დირექტივებს სრულად დაუახლოვა.
