საპარლამენტო უმრავლესობის ლიდერის, მამუკა მდინარაძის განცხადებით, ეკონომიკური და ფინანსური დანაშაულის ჩადენის შემთხვევაში, დაზარალებულისთვის ზიანის ანაზღაურების მიზნით, ბრალდებულისგან/მსჯავრდებულისგან, მისი ოჯახის წევრებისგან და მასთან დაკავშირებული პირებისგან ქონების ამოღება მარტივდება.
მისი თქმით, ახალი საკანონმდებლო ინიციატივის მიხედვით, ვიდრე პირი დაზარალებულს ზიანს არ აუნაზღაურებს, ქვეყანას ვერ დატოვებს. მდინარაძის განმარტებით, „ამის უზრუნველყოფის საშუალება სამაჯური იქნება“.
"ეს ინიციატივა ეხება ეკონომიკურ, ფინანსურ დანაშაულს და დანაშაულების ჩამდენ პირებს. არის განსაზღვრული კონკრეტული ეკონომიკური და ფინანსური დანაშაულები, რომელთა ჩადენის შემთხვევაში მარტივდება, დაზარალებულისათვის ზიანის ანაზღაურების მიზნით, მსჯავრდებულის, მისი ოჯახის წევრების და ასევე დაკავშირებული პირებისაგან მატერიალური რესურსების ამოღება.
იმ შემთხვევაში თუ ადამიანი ჩაიდენს ფინანსურ დანაშაულს, ეკონომიკურ დანაშაულს და მიაყენებს კონკრეტულ მეორე ადამიანს ზიანს, ამ მეორე ადამიანის ზიანის ანაზღაურების გამარტივების მიზნით, მარტივდება დამნაშავისგან, ოჯახის წევრებისგან და ასევე დაკავშირებული პირებისგან ქონების თანხის ამოღება. ეს თუ ხანგრძლივ და სხვადასხვა პროცედურას მოითხოვდა, მათ შორის სამოქალაქო დავას, რომელიც წლები გრძელდებოდა, ეს ახლა იქნება გამარტივებული". - თქვა მდინარაძემ.
მდინარაძის ცნობით, ახალი კანონპროექტით, პროკურორის მიმართვის საფუძველზე, სასამართლოს შეეძლება პირს, რომელმაც ფინანსური დანაშაული ჩაიდინა, გარკვეული ვადით შეუზღუდოს ქვეყნის დატოვების უფლება.
"გარდა ამისა, სისხლის სამართლის კოდექსში, სოციალური დაცვის ღონისძიების უზრუნველყოფის მიზნით, ჩვენ შეგვიძლია ვთქვათ, რომ შევა ცვლილება. ამის თანახმად, პროკურორი მიმართავს სასამართლოს და სასამართლოს შეუძლია გარკვეული ვადით შეუზღუდოს პირს ქვეყნის დატოვება. განსაზღვრული იქნება კონკრეტული ვადებიც, ეს ვადები მიბმული იქნება ორმაგ ვადაზე, განსაზღვრული იქნება ორმაგი ვადით, ვიდრე არის დანაშაულის ხანდაზმულობის ვადა. ნაკლებად მძიმეზე 6 წელი, შესაბამისად, ხანდაზმულობის ვადა არის 3 წელი ანუ 6 წლით, 12 წლით და 16 წლით აეკრძალება შესაბამისი ელექტრონული საშუალების, მოწყობილობის გამოყენებით და ამის უზრუნველყოფით აეკრძალება პირს ქვეყნის დატოვება, ვიდრე არ აანაზღაურებს დაზარალებულის ზიანს. ვიდრე ზიანს არ აანაზღაურებს, ქვეყანას ვერ დატოვებს და ამის უზრუნველყოფის საშუალება თავის მხრივ იქნება სამაჯური"- აღნიშნა მდინარაძემ.
მდინარაძის განცხადებით, გიორგი ბაჩიაშვილს თუ სხვა ნებისმიერ ადამიანს, რომელიც დღეს ბრალდებულია და ხვალ შეიძლება დამნაშავე იყოს, აქვს მოლოდინი, რომ ამდენი ზიანი მიაყენა სხვა ადამიანს, „წავა და თავისთვის ბედნიერად იცხოვრებს, თუმცა ეს ასე არ არის“.
„ეს ბაჩიაშვილი იქნება, თუ სხვა ნებისმიერ ადამიანი, რომელიც დღეს ბრალდებულია, ხვალ მსჯავრდადებული იქნება და მას დაუმტკიცდება, რომ ეს კონკრეტული დანაშაული ჩაიდინა და ამ დანაშაულის შედეგად მიაყენა მეორე ადამიანს შესაბამისი ზიანი, ვიდრე ამ ზიანს არ აანაზღაურებს ასე თავისუფლად უკაცრავად ამ სიტყვისთვის ვერ „იპარპაშებს“, ანუ თუ ვიღაცას, მათ შორის, კიდევ ერთხელ ვიმეორებ ბაჩიაშვილს თუ სხვა ნებისმიერ ადამიანს, რომელიც დღეს ბრალდებულია და ხვალ შეიძლება დამნაშავე იყოს, აქვს მოლოდინი, რომ ამდენი და ამდენი ზიანი მივაყენე სხვა ადამიანს და წავალ მეორე და ჩემთვის ბედნიერად ვიცხოვრებ, ეს ასე არ არის. თქვენ რომ ვიღაცამ ზიანი მოგაყენოთ და თქვენი ეს ნაწვალები ქონება, რაც ხელფასით გაქვთ დაგროვებული, სახლი თუ რაღაც რაც შეიძინეთ კრედიტით მოგპაროთ, წაგართვათ, მიითვისოს, ვიდრე არ დაგიბრუნებთ და ამისი ამოღება შესაძლებელი იქნება დაკავშირებული პირისგან, თუ დაუმტკიცდება, რა თქმა უნდა, დაუსაბუთებელი ქონება თუ ექნება ოჯახის წევრს და დაკავშირებულ პირს და იქნება მტკიცებულება იმისა, რომ ამით არის შეძენილი და ა.შ. გამარტივდება ამ ზიანის ანაზღაურება და დაზარალებულის ინტერესების დასაკმაყოფილებლად მიქცევა“, - განაცხადა მამუკა მდინარაძემ.
