რუსეთსა და უკრაინას შორის ტყვეების გაცვლის კიდევ ერთი ეტაპი დაიწყო, რომლის ფარგლებშიც, უკრაინაში მძიმედ დაჭრილები და 25 წლამდე ასაკის პირები ბრუნდებიან.
როგორც უკრაინის პრეზიდენტის, ვოლოდიმირ ზელენსკის Telegram-არხზე გამოქვეყნებულ ინფორმაციაშია აღნიშნული, უკრაინელები რუსული ტყვეობიდან სახლში ბრუნდებიან.
„გაცვლა დღეს დაიწყო და მომდევნო დღეებში რამდენიმე ეტაპად გაგრძელდება“, - თქვა მან.
უკრაინის პრეზიდენტმა განაცხადა, რომ ამჟამად დაბრუნებულთა კატეგორიებს შორის არიან დაჭრილები და მძიმედ დაჭრილები, ასევე 25 წლამდე ასაკის პირები.
„პროცესი საკმაოდ რთულია, ბევრი მგრძნობიარე დეტალია, მოლაპარაკებები პრაქტიკულად ყოველდღე გრძელდება“, - აღნიშნა ზელენსკიმ.
მისი თქმით, მოელიაბ, რომ სტამბოლში შეხვედრაზე მიღწეული ჰუმანიტარულ საკითხებზე შეთანხმებები სრულად შესრულდება.
„ჩვენ ყველაფერს ვაკეთებთ, რომ ყველა უკან დავაბრუნოთ. ამისთვის ყველა დონეზე ვმუშაობთ. ყველა, ვინც ტყვეობაშია, სახლში უნდა დავაბრუნოთ. მადლობა ყველას, ვინც გვეხმარება“, - აღნიშნა უკრაინის პრეზიდენტმა.
ამასთან, რუსეთის თავდაცვის სამინისტროს ცნობით, სტამბოლში მიღწეული შეთანხმებების შესაბამისად, რუსეთში 25 წლამდე ასაკის რუსი სამხედრო მოსამსახურეების პირველი ჯგუფი დააბრუნეს.
„25 წლამდე ასაკის რუსი სამხედრო მოსამსახურეების პირველი ჯგუფი დავაბრუნეთ. სანაცვლოდ, უკრაინის შეიარაღებული ძალების სამხედრო ტყვეების ანალოგიური რაოდენობა გადაეცათ“, - ნათქვამია რუსეთის თავდაცვის სამინისტროს განცხადებაში. მათივე ცნობით, რუსი სამხედრო მოსამსახურეები ბელარუსში იმყოფებიან.
გაცვლილი ტყვეების რაოდენობის შესახებ ინფორმაციას არც უკრაინული და არც რუსული მხარე რ ავრცელებენ.
