რუსეთში, უკრაინის საზღვრიდან 865კმ-ის მოშორებით, ჩუვაშეთის რესპუბლიკის ქალაქ ჩებოქსარში დაიბომბა რუსეთის თავდაცვის სამინისტროს დაქვემდებარებაში არსებული საწარმოები, რომლებიც ამზადებენ სანავიგაციო ტექნიკას რუსეთის შეიარაღებული ძალებისთვის და ასევე სხვადასხვა ტიპის ელექტრონულ მოწყობილობებს.
ჩუვაშეთის რესპუბლიკის ხელმძღვანელი ოლეგ ნიკოლაევი წერს, რომ ტერიტორიაზე ორი უპილოტო საფრენი აპარატი ჩავარდა, რის გამოც თანამშრომლების უსაფრთხოების უზრუნველსაყოფად წარმოების დროებით შეჩერების გადაწყვეტილება მიიღეს.
მისივე თქმით, კიდევ ერთი დრონი ჩებოქსარისა და კრასნოარმეისკის მუნიციპალური ოლქების მინდვრებში ჩავარდა - ადამიანებს საფრთხე არ ემუქრებათ.
გუბერნატორს არაფერი უთქვამს ქარხანაზე თავდასხმის შედეგებზე, მხოლოდ აღნიშნა, რომ მსხვერპლი არ ყოფილა და „ყველა სამსახური გაძლიერებულ რეჟიმში მუშაობს“.
თუმცა, Telegram-ის არხი Astra ქარხანაში გაჩენილი ხანძრის ამსახველ ფოტოებსა და ვიდეობს აქვეყნებს.
უკრაინული კამიკაძე დრონების საფრთხის ფონზე რუსებმა შეაჩერეს ფრენები ყაზანის, ნიჟნი ნოვგოროდის, სარატოვისა და ტამბოვის საერთაშორისო აეროპორტებში.
