ჩვენ ვაფასებთ თურქეთის შუამავლის როლს სამართლიანი და მდგრადი მშვიდობის მიღწევის მცდელობაში, - ამის შესახებ უკრაინის პრეზიდენტმა ვოლოდიმირ ზელენსკიმ განაცხადა.
როგორც ზელენსკიმ აღნიშნა, პარასკევს იგი შეხვდა თურქეთის საგარეო საქმეთა მინისტრს, ჰაკან ფიდანს, და მადლობა გადაუხადა მას სამშვიდობო ძალისხმევის მხარდაჭერისთვის, კერძოდ, უკრაინა-რუსეთის შეხვედრის ორგანიზებაში დახმარებისთვის, რომლის შემდეგაც შესაძლებელი გახდა ათასი უკრაინელის რუსული ტყვეობიდან გათავისუფლება.
გარდა ამისა, შეხვედრაზე განიხილეს უკრაინისა და მისი პარტნიორების დიპლომატიური ძალისხმევა.
„ჩვენ ვაფასებთ თურქეთის შუამავლის როლს სამართლიანი და მდგრადი მშვიდობის მიღწევის მცდელობაში. ჩვენ მადლიერები ვართ თურქეთის მკაფიო პოზიციისთვის - უკრაინის სუვერენიტეტისა და ტერიტორიული მთლიანობის თანმიმდევრული და სრული მხარდაჭერისთვის“, - განაცხადა ზელენსკიმ.
