ჯიღაურას მრავალწლოვანი კულტურების გენეტიკური რესურსების ეროვნულმა ბაზამ პარლამენტის აპარატის სტაჟიორებს და ახალგაზრდული პარლამენტის წევრებს უმასპინძლა.
ჯიღაურაში იმყოფებოდნენ საქართველოს პარლამენტის თავმჯდომარე შალვა პაპუაშვილი, პარლამენტის თავმჯდომარის პირველი მოადგილე გიორგი ვოლსკი, გარემოს დაცვისა და სოფლის მეურნეობის მინისტრი დავით სონღულაშვილი, აგრარულ საკითხთა კომიტეტის თავმჯდომარე გელა სამხარაული, კომიტეტის წევრები და სხვა მოწვეული სტუმრები.
„ჯიღაურას მრავალწლოვანი კულტურების გენეტიკური რესურსების ეროვნული ბაზა სტრატეგიული მნიშვნელობის ობიექტი, ჩვენი ქვეყნის საგანძურია. 2007 წელს ბატონი ბიძინა ივანიშვილის უშუალო ჩართულობით და ინიციატივით დაიწყო ამ ბაზის შექმნაზე მუშაობა. 2014 წელს კი, ბატონმა ბიძინა ივანიშვილმა ჯიღაურას ბაზა სახელმწიფოს გადასცა.
დღეს ბაზაზე სტუმრად მოსულ ახალგაზრდებს საშუალება ჰქონდათ დაეთვალიერებინათ უნიკალური კოლექცია, როგორც ვაზის ჯიშების, ასევე, სხვადასხვა მრავალწლოვანი ნარგაობების. ეს ახალგაზრდები საქართველოს პარლამენტში გადიან სტაჟირებას. თითოეული დღე და თითოეული წუთი, რომელსაც ისინი ატარებენ საქართველოს პარლამენტში, ასეთი გასვლითი ღონისძიებები არის შესაძლებლობა, რომ კიდევ უფრო მეტი რამ ნახონ, მეტი გაიგონ და უფრო მყარად და თანმიმდევრულად გააგრძელონ წინსვლა. მადლობა ინტერესისთვის, პატრიოტული სულისთვის. ჩვენი მხრიდან მზად ვართ, ნებისმიერ დროს და მოცემულობაში გვერდით ვიყოთ. ეს ახალგაზრდები არიან მომავალი საჯარო მოხელეები. მხოლოდ ასეთი ინტერესით და საქმისადმი ასეთი დამოკიდებულებით არის შესაძლებელი, რომ უფრო გაძლიერდეს და განვითარდეს ჩვენი ქვეყანა“, - განაცხადა გარემოს დაცვისა და სოფლის მეურნეობის მინისტრმა დავით სონღულაშვილმა.
ჯიღაურაში საქართველოს პარლამენტის აპარატის სტაჟიორები და ახალგაზრდული პარლამენტის წევრები აგრარულ საკითხთა კომიტეტის გასვლით სხდომასაც დაესწრნენ.
სოფლის მეურნეობის სამეცნიერო-კვლევითი ცენტრის დირექტორმა ლევან უჯმაჯურიძემ ახალგაზრდებს ჯიღაურას ბაზაზე მიმდინარე საქმიანობის შესახებ პრეზენტაცია წარუდგინა.
