მაგალითად, პოლონეთის სტატისტიკა რომ ავიღოთ, დაახლოებით საქართველოს 750 მოქალაქეს ეთქვა უარი პოლონეთში შესვლაზე, – ამის შესახებ საქართველოს პრემიერ-მინისტრმა, ირაკლი კობახიძემ ბუდაპეშტში, ჟურნალისტიკის კითხვის საპასუხოდ განაცხადა, რომელიც პოლონეთის და საფრანგეთის საელჩოების განცხადებებს ეხებოდა.
მთავრობის მეთაურის თქმით, მეტი სტუმართმოყვარეობა მართებთ საფრანგეთს, პოლონეთს და ზოგიერთ სხვა ქვეყანას.
„აქ სტატისტიკაა ძალიან საინტერესო და მნიშვნელოვანი. როდესაც 33 000-ზე მეტი მოქალაქე შემოდის ქვეყანაში და აქედან მხოლოდ 16-ს ეთქმება უარი, ეს ხომ ყველაფერს თავისთავად ცხადჰყოფს. პირიქით რომ ავიღოთ, მაგალითად, პოლონეთის სტატისტიკა, დაახლოებით საქართველოს 750 მოქალაქეს ეთქვა უარი პოლონეთში შესვლაზე. ხომ ყველაფერი ნათელია. ყველაფერი არის აბსოლუტურად ცხადი. არავითარ აქციებში არ მონაწილეობდნენ საქართველოს მოქალაქეები, როდესაც მათ უთხრეს უარი პოლონეთში შესვლაზე. რაც შეეხება აქციებში მონაწილეობას, ეს რომ არის ერთ-ერთ საკითხად გამოტანილი ამ განცხადებებში, ეს არის გაუგებარი. რა ესაქმება 150-კაციან აქციებზე 5-6 უცხოელ მოქალაქეს, ამაზე უნდა გასცეს შესაბამისმა სახელმწიფომ პასუხი. კიდევ ერთხელ გავიმეორებ, სტატისტიკა რომ ავიღოთ, ერთი მხრივ, საქართველოს მოქალაქეებთან დაკავშირებული, მეორე მხრივ, პოლონეთის, საფრანგეთის, სხვა ქვეყნების მოქალაქეებთან დაკავშირებული, ყველაფერი არის აბსოლუტურად ნათელი, როგორია ჩვენი დამოკიდებულება საქართველოს სტუმრების მიმართ. ეს არის აბსოლუტურად ცხადი და ამას ცხადჰყოფს სტატისტიკა. როგორია ქართველების მიმართ დამოკიდებულება შესაბამის ქვეყნებში, მათ შორის, პოლონეთში და საფრანგეთში, ამასაც ცხადჰყოფს შესაბამისი სტატისტიკა. მეტი სტუმართმოყვარეობა მართებთ საფრანგეთს, პოლონეთს და ზოგიერთ სხვა ქვეყანას. ჩვენ ეს არავისგან გვესწავლება“, – განაცხადა ირაკლი კობახიძემ.
ცნობისთვის, საქართველოში პოლონეთისა და საფრანგეთის საელჩოებმა გაავრცელეს განცხადებები, რომლითაც საკუთარ მოქალაქეებს მიმართეს, საქართველოში გამგზავრებამდე შეაფასონ ფაქტორები, რომლებიც შესაძლოა, ქვეყანაში შესვლაზე უარის თქმის საფუძველი გახდეს. საელჩოები აცხადებენ, რომ აღნიშნული ფაქტორები, შეიძლება, მოიცავდეს დემონსტრაციებში მონაწილეობასაც.
