ალბათ, ყველა აპირებს, არჩევნებში მიიღოს მონაწილეობა, ოღონდ ეს არჩევნები უნდა იყოს ჯერ საპარლამენტო და მერე ადგილობრივი ან ბოლო-ბოლო, თუ სხვა არა, ერთობლივად, საპარლამენტო და ადგილობრივი, ამისთვის აუცილებელია ახალი წესები, რომელიც შევქმენით წინააღმდეგობის პლატფორმის ფარგლებში, – ამის შესახებ საქართველოს ყოფილმა პრეზიდენტმა, სალომე ზურაბიშვილმა განაცხადა.
„საბოლოო გამარჯვებისთვის საჭიროა საზოგადოების ერთობა, შემართება, ერთად დგომა და ეს მიღწეულია, რადგან პროტესტი ეხება ყველას, ყველგან მიაღწია, ყველა თაობა და რეგიონი ჩართულია. ადამიანები დგანან გორში, ბათუმში, ზუგდიდში. ეს პროტესტი არის ის, რაც აცოცხლებს ყველა მარშს, გამოსვლას. აქციების პირველი შედეგია, რომ არ არის აღიარებული „ოცნების“ ხელისუფლება ჩვენი მეგობრებისგან და .ე.წ. პარტნიორებისგან. მეორე შედეგია სანქციები და ეს ტალღა გაგრძელდება, რომელიც ეხება პასუხისმგებელ პირებს და არა ხალხს. ძალიან კარგად შეიგნეს ჩვენმა პარტნიორებმა, რომ ერთ მხარეს დგას ხალხი, რომელსაც უნდა ევროპაში და მეორე მხარეს დგანან ადამიანები, რომლებიც არაფერს არ წარმოადგენენ გარდა საკუთარი და ჩრდილოელი მეზობლის ინტერესებისა. ჩვენი უცხოელი პარტნიორების მხარდაჭერა ასევე დამოკიდებულია იმ პროტესტზე, რომელიც არის ჩვენი ზურგი და ხერხემალი. მადლობა პროტესტს ამისთვის. და მესამე კომპონენტი საბოლო გამარჯვების ფორმულისთვის – უნდა შეიქმნას პოლიტიკური ალტერნატივა, რომელიც ისარგებლებს ჩვენი და პარტნიორების ნდობით. ყველამ ვიცით, რომ ვერც ერთი პარტია ცალკე ვერაფერს ვერ მიიღებს. ერთადერთი ბერკეტი „ქართული ოცნების“ არის, რომ შემოიტანოს საზოგადოებასა და პარტიებში დაყოფა. ეს არის ყველა დიქტატორული რეჟიმის ხერხი – დაყავი და იბატონე. ეს არ უნდა დავუშვათ. ამიტომ შევქმენით „წინააღმდეგობის პლატფორმა“. ერთობლივად ვმუშაობთ და ვაყალიბებთ გარე პარტნიორებისთვის ჩვენს პოზიციებს. „ქართული ოცნება“ ცდილობს, ესეც დაშალოს და შემოაგდო თვითმმართველობის არჩვენებისა და პარლამენტში შესვლის თემა. არავინ არ აპირებს პარლამენტში შესვლას. სამაგიეროდ, ალბათ, ყველა აპირებს, არჩევნებში მიიღოს მონაწილეობა, ოღონდ ეს არჩევნები უნდა იყოს ჯერ საპარლამენტო და მერე ადგილობრივი ან ბოლო-ბოლო, თუ სხვა არა, ერთობლივად, საპარლამენტო და ადგილობრივი. ამისთვის აუცილებელია და ამაზე ნუ დაიწყებთ ეჭვებს და ჭორაობას, აუცილებელია ახალი წესები, რომელიც შევქმენით წინააღმდეგობის პლატფორმის ფარგლებში და, რომელიც იქნება ჩვენი მიდგომები არჩევნებისთვის“, – განაცხადა ზურაბიშვილმა.
მისივე თქმით, საჭიროა ახალი არჩევნებისთვის მომზადება.
„აუცილებელია მზადება, რომ დამკვირვებლები, მთელი არმია მოვამზადოთ აქ და დღესვე, ეს უკვე დაწყებული უნდა იყოს. აუცილებელია, რომ დიასპორამ გამოიღვიძოს და დაიწყოს რეგისტრირება, რომ არ იყოს ბოლო წუთში მოუმზადებელი და დაგვიანებული. ეს მზადება არის საერთო, რომ ყველამ ერთად, ოპოზიციამ დაიცვას ყველას ხმა. ეს არის გამარჯვების ფორმულა და მე ამაში ვარ დარწმუნებული. ჩვენი მისატანია ბოლომდე“, – განაცხადა ზურაბიშვილმა.
