ახლად დანიშნული ბიზნესომბუდსმენი გიორგი პერტაია ამ პოსტზე მუშაობას უკვე შეუდგა. როგორც პერტაიამ დღეს ამ რანგში გამართულ პირველ პრესკონფერენციაზე განაცხადა, ის მთავრობასა და ბიზნესს შორის ნდობის აღდგენას შეეცდება.
"ბიზნესომბუდსმენის ფუნქციები განსაზღვრულია კანონით. ბიზნესომბუდსმენის დანიშვნა ახალი საგადასახადო კურსის ფარგლებში განხორციელდა და მისი მიზანი იყო, შერჩეულიყო პიროვნება, რომელიც ბიზნესსა და მთავრობას შორის ერთგვარი ხიდი იქნებოდა. ასევე ჩემი მიზანი იქნება არსებული სერვისის გაუმჯობესება და საგადასახადო კანონმდებლობის დახვეწა", - განმატრა პერტაიამ.
მისი განმარტებით, ომბუდსმენის მიზანი მიღწეულ იქნება მაშინ, როცა კერძო სექტრს საშუალება ექნება, დაგეგმოს ბიზნესი წლების განმავლობაში, იგრძნოს თავი დაცულად და იხელმძღვანელოს საგადასახადო კოდექსით, რომლის გაგებაც ორგვარი ინტერპრეტაციით არ იქნება შესაძლებელი.
ბიზნესომბუდსმენმა კერძო სექტორს მის აპარატთან აქტიური თანამშრომლობისკენ მოუწოდა და განუმარტა, რომ საგადასახადო კანონმდებობასთან დაკავშირებით შუეძლიათ ნებისმიერი შენიშვნა წარმოადგინონ.
"პრემიერ-მინისტრთან მუდმივად მიმდნარეობს სამუშაო იმასთან დაკავშირებით, რომ საგადასახადო კოდექსის მაქსიმალური დახვეწა მოხდეს და ისეთი ოპტიმალური ვარიანტი შეიქმნას, რომელიც როგორც მთავრობისთვის, ასევე ბიზნესისთვის იქნება მისაღები", - განაცხადა პერტაიამ და ივარაუდა, რომ მაქსიმუმ 6 თვეში საგადასახადო კანონმდებლობასთან დაკავშირებული ყველა ხარვეზი, რომელიც მისი ამოქმედების შემდეგ გამოვლინდა, უნდა აღმოიფხვრას.
"როცა კანონდებლობის ოპტიმალურ ვარიანტზე მოხდება შეჯერება, კოდექსში ცვლილებები აღარ შევა. მუდმივი ცვლილებები არც მთავრობის და არც კერძო სექტორის ინტერესებში არ შედის", - აღნიშნა პერტაიამ და დააკონკრეტა რომ ბიზნესომბუდსმენის აპარატი განსაკუთრებულ ყურადღებას მცირე და საშუალო ბიზნესის წარმომადგენლებზე გაამახვილებს.
შეგახსენებთ, რომ ბიზნესომბუდსმენის ინცსტიტუტი საქართველოში პირველად შემოდის. ამ პოსტზე პრემიერ-მინისტრმა ნიკოლოზ გილაურმა პერტაია პარლამენტის თავმჯდომარე დავით ბაქრაძესთან კონსულტაციების შემდეგ დანიშნა, თუმცა სად განთავსდება ბიზნესომბუდსმენის აპარატი, ამ ეტაპზე გადაწყვეტილი არ არის.
