რუსეთის მიერ ოკუპირებულ აფხაზეთში, სოხუმის აეროპორტიდან პირველ ავიარეისებს სანქცირებული ავიაკომპანიები შეასრულებენ. როგორც რუსეთის ტრანსპორტის სამინისტრო იტყობინება, სოხუმის აეროპორტიდან დაგეგმილ ავიარეისებზე ბილეთების გაყიდვა უკვე დაწყებულია.
უწყების ინფორმაციით, 3 მაისისთვის დაგეგმილია პირველი რეისი მოსკოვის ვნუკოვოს აეროპორტიდან სოხუმის მიმართულებით, ფრენას შეასრულებს ავიაკომპანია UVT AERO.
6 მაისიდან კი ნიჟნი-ნოვგოროდიდან სოხუმის მიმართულებით იფრენს ავიაკომპანია Ikar-ი
მანამდე გახდა ცნობილი, რომ "როსავიაციამ" ოკუპირებულ აფხაზეთში მოსკოვიდან ფრენის ნებართვა მისცა ავიაკომპანია iFly. ასევე მოსკოვიდან და კრასნოიარსკიდან ფრენისთვის კი - ავიაკომპანია Nordstar-ს, თუმცა რუსეთის ტრანსპორტის სამინისტროში ამ კომპანიებისთვის ფრენის ნებართვის თარიღი მითითებული არ არის.
ამასთან, ოთხივე ამ ავიაკომპანიის წინააღმდეგ დაწესებულია სანქციები და ევროკავშირის ქვეყნებში ფრენების შესრულება აკრძალული აქვთ.
