„ამ პლატფორმის ამოცანა ის კი არ არის, რაღაც ერთიანობას მიაღწიოს? ის ერთიანობა რისთვის გინდა, რომ მივაღწიოთ პროტესტის ამოცანებს, ახალ არჩევნებს რომ მივაღწიოთ, ანუ ძალაუფლების მშვიდობიან გადაბარებას რომ მივაღწიოთ. ამისთვის არის ეს პლატფორმა, თორემ იმიტომ კი არა, რომ ერთიანები ვიყოთ“, – ამის შესახებ პარტია „ფედერალისტების“ ერთ-ერთმა დამფუძნებელმა, თამარ ჩერგოლეიშვილმა მეხუთე პრეზიდენტის, სალომე ზურაბიშვილის ინიცირებულ წინააღმდეგობის პლატფორმასთან დაკავშირებით საქართველოს პირველი არხის გადაცემა „აქტუალური თემა მაკა ცინცაძესთან ერთად“ სტუმრობისას განაცხადა.
ჩერგოლეიშვილის თქმით, ეს პლატფორმა არის ყოველდღიური რუტინული მუშაობა.
„აქ შენ ვერ გექნება რაღაც ხმამაღალი განცხადებები, რომ უნდა გამოვიტაცოთ „ვივამედიდან“ ჩვენი მზეთუნახავი. ანუ, ამისთვის არ არის ეს პლატფორმა შექმნილი, რომ მზეთუნახავები გამოვიტაცოთ საიდანღაც. შესაბამისად, იმის გამო, რომ აქამდე ყოველთვის ეგ იყო ხოლმე მთავარი თემა, შეუგუებლობა ხდება ახალ ფორმატთან, მაგრამ თავისთავად ეს შეუგუებლობაც ხომ ძალიან კარგია, აჩვენებს, რომ რაღაც ახალი იბადება“, – განაცხადა ჩერგოლეიშვილმა.
მისივე თქმით, ხელისუფლება ცდილობს, ყველა ერთ ქვაბში ჩაყაროს, ვითომ ყველა „ნაციონალური მოძრაობაა“.
„სალომე ზურაბიშვილი ზუსტად ამას არღვევს. ამას გარდა რა, ბადრი ჯაფარიძეს და მამუკა ხაზარაძეს, რომელთა მიმართ ბუნებრივია, სოლიდარული ვარ, რატომ ეძახის ამ „ნაციონალური მოძრაობის“ გამოძიებაზე? კომიკურია ხომ? ბოკერია-სააკაშვილის სისხლიანი რეჟიმი უნდა გასამართლდესო და ბოკერია ზის სახლში, ცნობილი მიმი რომ არის ნარკოზის, რომ ზის ასე მოწყენილი, ასე ზის, ელოდება, რომ დაუძახებენ კომისიაზე, მაგრამ ამას არავინ არ ეძახის“, – განაცხადა ჩერგოლეიშვილმა.
