უკრაინაში სრულმასშტაბიანი შეჭრის დაწყების შემდეგ, რუსეთმა 900 000-ზე მეტი ჯარისკაცი დაკარგა, მათგან 250 000 დაიღუპა.
ამის შესახებ ინფორმაცია ნატო-ს მაღალჩინოსანმა ბრიუსელში ალიანსის საგარეო საქმეთა მინისტრების შეხვედრის ფარგლებში გამართულ ბრიფინგზე განაცხადა.
მისი თქმით, დაჭრილ რუს სამხედრო მოსამსახურეებს შორის ბევრმა მიიღო მთელი სიცოცხლის მანძილზე დაზიანებები არასათანადო სამედიცინო დახმარების გამო.
რუსული არმია მოკლულებისა და დაჭრილების სახით დღეში 1000-ზე მეტ სამხედროს კარგავს, მაგრამ მისი რეკრუტირების მაჩვენებელი, ჩრდილოატლანტიკური ალიანსის მონაცემებით, ჯერ კიდევ შეესაბამება მის დანაკარგებს.
”რუსული ჯარების წინსვლა უკრაინაში ნელდება, მისი დანაკარგები იზრდება, მაგრამ რუსეთის ხელისუფლება მზადაა განაგრძოს დიდი დანაკარგები ნელი წარმატებების სანაცვლოდ”, - განაცხადა ნატო-ს ოფიციალურმა წარმომადგენელმა.
ის ფიქრობს, რომ რუსული საზოგადოება მივიდა იმ აზრამდე, რომ აღარ არის მზად ამის გადასატანად. ნატოს შეფასებით, ვითარება ბრძოლის ველზე, ძალიან მძიმე რჩება.
მისი პროგნოზით, რუსეთი გააგრძელებს ზეწოლას უკრაინის შეიარაღებულ ძალებზე ფრონტის ხაზზე და ზოგადად უკრაინის მთელ ტერიტორიაზე, რათა გაახანგრძლივოს ომი და გაზარდოს თავისი უპირატესობა მოლაპარაკებებში წარმატების მისაღწევად.
მისივე თქმით, ბალანსი ჯერ კიდევ არ არის უკრაინის მხარეზე, რუსეთი ინარჩუნებს თავის უპირატესობას და იმპულსს და ასევე ცდილობს გაიმარჯვოს უკრაინის არმიაში არსებული დეფიციტის ხარჯზე.
„ბრძოლის ველზე არ არსებობს არანაირი ნიშანი იმისა, რომ რუსები ემზადებიან ცეცხლის შეწყვეტისთვის. ჩვენ ვერ ვხედავთ იმის ნიშანს, რომ რუსეთის მიზნები ამ ომში შეიცვალა“, - აღნიშნა ნატო-ს მაღალჩინოსანმა.
