აუცილებლად მივაღწევთ რეჟიმის ჩამოშლას, – ამის შესახებ „ფედერალისტების“ ლიდერმა, თამარ ჩერგოლეიშვილმა განაცხადა.
მისივე თქმით, „რეჟიმის ჩამოშლის შემდეგ დასრულდება ქვეყანაში პოლიტიკური დევნა“.
„ძალიან კარგი დღე გვქონდა, რადგან ვხედავთ, რომ ბიძინა ივანიშვილის ყელზე ყულფი ვიწროვდება. სიმბოლურია, რომ გუშინ, როდესაც პოლიტპატიმრების მშობლები აქციას მართავდნენ, პარალელურად, საბანკო ბარათები გაეთიშათ რეჟიმის ბოროტ თოჯინებს, ბიძინა ივანიშვილის ბოროტ თოჯინებს, პოლიტიკური დევნის ინსტრუმენტებს – მურუსიძესა და ჩინჩალაძეს. ეს იყო კარგი, ასევე ძალიან საინტერესო იყო სახელმწიფო დეპარტამენტის განცხადება.
იცით, რომ ჯეი დი ვენსს ხშირად იყენებს ხოლმე „ქართული ოცნება“, როგორც ამერიკასთან დალაგების ინსტრუმენტს და სიმბოლური იყო ისიც, რომ ჯეი დი ვენსის სიტყვებით უპასუხა სახელმწიფო დეპარტამენტმა. დღეს გამოაგორეს კიდეც ის შათირიშვილი, რომელიც იდგა და ისევ „დიფ სთეითზე“ როშავდა რაღაცებს „ქართული ოცნების“ ლოიალისტების დასამშვიდებლად, რომლებიც ძალიან ნერვიულობენ.
ჩვენ კარგად ვხედავთ და კვლევებიც ამას ადასტურებს, რომ „ქართული ოცნების“ ლოიალისტები არიან მძიმე მდგომარეობაში. ისინი ბიძინა ივანიშვილისგან ელოდებიან კრიზისის გადაწყვეტას და პირველ რიგში, თუ ადგილობრივი პროტესტით, მერე უკვე დასავლეთის წნეხით ჩვენ კრიზისი გავაგრძელეთ და ბიძინა ივანიშვილმა ვერ მოაგვარა ეს კრიზისი, აუცილებლად მივაღწევთ რეჟიმის ჩამოშლას, ძალაუფლების გადაბარებას თავისუფალი არჩევნების გზით, რაც დაასრულებს პოლიტიკურ დევნას ჩვენს ქვეყანაში“, – განაცხადა ჩერგოლეიშვილმა.
