საგარეო საქმეთა მინისტრმა, მაკა ბოჭორიშვილმა „იმედის“ ეთერში ავსტრიის საგარეო საქმეთა მინისტრ, ბეათე მაინლ-რაიზინგერთან შეხვედრაზე ისაუბრა.
ვაცნობიერებ თუ რა ვალდებულებები აქვთ ევროკავშირის წევრი სახელმწიფოების საგარეო საქმეთა მინისტრებს, როდესაც ისინი ერთგვარად ვალდებულები არიან ევროკავშირის გზავნილი თუ ბრიუსელის გზავნილი ასახონ საკუთარ გზავნილებში, - განაცხადა გადაცემაში „იმედი LIVE“ საგარეო საქმეთა მინისტრმა მაკა ბოჭორიშვილმა.
მან ავსტრიაში ვიზიტი შეაფასა და თქვა, რომ მხარეებს შორის შედგა საქმიანი დიალოგი.
„მე მაქვს ურთიერთობა ჩემს კოლეგებთან. ბოლოს იყო ავსტრია და მქონდა შეხვედრა ავსტრიის ახალ საგარეო საქმეთა მინისტრთან, წინა საგარეო საქმეთა მინისტრთანაც მქონდა შესაძლებლობა შეხვედრის მალტაზე, როდესაც ჩვენ ვიყავით ეუთოს მინისტერიალის ფარგლებში. მე ვიტყოდი, რომ შეხვედრა იყო ძალიან კარგი, ძალიან პოზიტიური, ძალიან ბევრ თემაზე ვისაუბრეთ და ვიმსჯელეთ. მაგრამ იმასაც კარგად ვაცნობიერებ თუ რა ვალდებულებები აქვთ ევროკავშირის წევრი სახელმწიფოების საგარეო საქმეთა მინისტრებს, როდესაც ისინი ერთგვარად ვალდებულები არიან ევროკავშირის გზავნილი თუ ბრიუსელის გზავნილი ასახონ საკუთარ გზავნილებში. ასეც მოხდა და ასეც ველოდით, რომ მოხდებოდა. ერთი იყო შეხვედრა, ერთი იყო ის რაზეც ჩვენ ვისაუბრეთ და მეორე იყო გზავნილი, რომელიც ერთგვარად ვალდებული არიან, რომ გაჟღერდეს, ბრიუსელის გზავნილი.
თუმცა მე ცალსახად შემიძლია ვთქვა კონკრეტულად ავსტრიის შემთხვევაში, როდესაც საქმე ეხება საქმეს, როდესაც საქმე ეხება საქმეზე დაფუძნებულ ურთიერთობებს აქ სასაუბრო ნამდვილად ბევრი გვაქვს. შეხვედრაც საქმიანი იყო, გეგმებიც საქმიანია და დარწმუნებული ვარ რომ წლის ბოლომდე ძალიან ბევრ ნაბიჯს გადავდგამთ იმისთვის, რომ კონკრეტულად ამ ორ ქვეყანას შორის ურთიერთობები კიდევ უფრო გაძლიერდეს. მითუმეტეს, როდესაც ვსაუბრობთ ეკონომიკურ ურთიერთობებზე და ბიზნესებს შორის კავშირებზე. ასევე, ხდება ხოლმე სხვა შემთხვევებშიც, როდესაც კონკრეტულად საქმეზეა საუბარი და გავცდებით რიტორიკას, გავცდებით კამერებს და საჯარო განცხადებებს“, - განაცხადა მაკა ბოჭორიშვილმა.
მაკა ბოჭორიშვილი, ავსტრიაში, ავსტრიის საგარეო საქმეთა მინისტრს 27 მარტს შეხვდა. შეხვედრის შესახებ ქართულმა და ავსტრიულმა მხარემ განსხვავებული განცხადებები გაავრცელეს.
საქართველოს საგარეო უწყება წერდა, რომ "ავსტრია საქართველოს მნიშვნელოვან პარტნიორად განიხილავს და დადებითად აფასებს ორი ქვეყნის დინამიკურ ურთიერთობებს". ასევე, "ავსტრიის მხარემ კიდევ ერთხელ დააფიქსირა მხარდაჭერა საქართველოს ევროპული ინტეგრაციის მიმართ. თავის მხრივ, ქართულმა მხარემ კვლავაც დაადასტურა ქვეყნის ევროკავშირში გაწევრიანების სურვილი".
რაც შეეხება ავსტირულ მხარეს, ბეათე მაინლ-რაიზინგერმა შეხვედრის შემდეგ თქვა, რომ ავსტრია მზადაა ქართველი ხალხის ევროპულ მისწრაფებებსა და საქართველოს ევროკავშირში გაწევრიანების გზას მხარი დაუჭიროს, "თუკი ხელისუფლება შეცვლის ამჟამინდელ კურსს".
"ჩემს ქართველ კოლეგას მკაფიოდ განვუცხადე, რომ ჩვენ მკაცრად ვგმობთ მშვიდობიანი მომიტინგეებისა და მედიის წარმომადგენლების წინააღმდეგ ძალადობას. საქართველოს ხელისუფლებამ პატივი უნდა სცეს შეკრებისა და გამოხატვის თავისუფლება და ძალის გამოყენებისგან თავი შეიკავოს. ძალადობის ყველა აქტი უნდა იქნას გამოძიებული, ხოლო დამნაშავეები - პასუხისგებაში მიცემული". - თქვა ავსტრიის საგარეო საქმეთა მინისტრმა.
