შეშფოთებული ვართ„ქართული ოცნების“ გადაწყვეტილებითგადასცეს ანაკლიის ღრმაწყლოვანი პორტის კონტროლი ჩინეთის კომუნისტური პარტიის მიერ მხარდაჭერილ, აშშ-ის მიერ სანქცირებულ კონგლომერატს, ამის შესახებ აშშ-ის ჰელსინკის კომისიის განცხადებაშია ნათქვამი.
ერთობლივ განცხადებას ავრცელებენ ჰელსინკის კომისიის თავმჯდომარე, სენატორი როჯერ უიკერი, თანათავმჯდომარე კონგრესმენი, ჯო უილსონი, სენატორი შელდონ უაითჰაუსი, კონგრესმენი სტივ კოენი, კონგრესმენი მარკ ვიზი და სენატორი ჯონ კორნინი.
მათი განცხადებით, ანაკლიის პორტის განვითარება და კონტროლი შორსმიმავალ გავლენას მოახდენს როგორც ჩინეთის შესაძლებლობებზე, გააგრძელოს ეკონომიკური იძულების კამპანია შავი ზღვის რეგიონში, ასევე საქართველოს, როგორც დამოუკიდებელი, დემოკრატიული სახელმწიფოს მომავალზე. ეს გარიგება აპრილის შუა რიცხვებში უნდა დასრულდეს.
„ჩვენ შეშფოთებული ვართ ცნობებით „ქართული ოცნების“ გადაწყვეტილების შესახებ, გადასცეს ანაკლიის ღრმაწყლოვანი პორტის კონტროლი ჩინეთის კომუნისტური პარტიის მიერ მხარდაჭერილ, აშშ-ის მიერ სანქცირებულ კონგლომერატს. ამ გარიგებაში მონაწილე დეველოპერებს, მათ შორის China Communications Construction Company-ს, აქვთ ინფრასტრუქტურის განვითარების პროექტების გამოყენების გამოცდილება მასპინძელი ქვეყნების ექსპლუატაციისა და დესტაბილიზაციისთვის, ამ ქვეყნების ჩინეთზე დამოკიდებულების გაღრმავებისთვის.
ჩინეთის მზარდი ყოფნა შავ ზღვაში, რუსეთთან თანამშრომლობით, რეგიონს ნაკლებად უსაფრთხოს ხდის და ზღუდავს თავისუფალ ვაჭრობას. „ქართული ოცნება“ ამ შეთანხმების წინსვლით კიდევ უფრო მეტად შეუქმნის საფრთხეს ქვეყნის დემოკრატიულ ტრაექტორიას და საკუთარი ეკონომიკური მომავლის განსაზღვრის უნარს. ჩვენ მოვუწოდებთ „ქართულ ოცნებას“, გადახედოს ამ გადაწყვეტილებას და სამართლიანად, გამჭვირვალედ შეაფასოს მისი კრიტიკული ინფრასტრუქტურის განვითარების წინადადებები“, – ნათქვამია ჰელსინკის კომისიის წევრების განცხადებაში.
