აქციების დროს დაკავებული 11 პირის პროცესი მოსამართლე ნინო გალუსტაშვილმა 24 აპრილამდე გადადო. დღეს საქმის არსებითი განხილვის პირველი სხდომა იყო ჩანიშნული.
როგორც გალუსტაშვილმა განმარტა, საქმე განსახილველად მას გუშინ დაეწერა, რადგან მასალები მოცულობითია, საქმის გასაცნობად ადვოკატებს სხდომის გადადება შესთავაზა. ადვოკატები გალუსტაშვილის შეთავაზებას არ დაეთანხმნენ. მათი განცხადებით, თარიღის ცვლილება ტექნიკური პროცესის დარღვევაა.
დღეს, თბილისის საქალაქო სასამართლოში, აქციების დროს სისხლის სამართლის წესით დაკავებული 11 პირის: ანდრო ჭიჭინაძის, ონისე ცხადაძის, გურამ მირცხულავას, ლუკა ჯაბუას, ჯანო არჩაიას, რუსლან სივაკოვის, ვალერი თეთრაშვილის, გიორგი ტერიშვილის, ირაკლი ქერაშვილის, რევაზ კიკნაძისა და სერგეი კუხარჩუკის საქმეს განიხილავდა.
დღევანდელ სხდომაზე, ადვოკატებმა მოსამართლეს სხდომის გახსნის შუამდგომლობით მიმართეს. 11 პირის სასამართლო სხდომები, საქმის განმხილველი წინა მოსამართლის ირაკლი შვანგირაძის გადაწყვეტილებით, ნახევრად-დახურულ რეჟიმში ტარდება - ბრალდებულების ოჯახის წევრებსა და ახლობლებს სხდომათა დარბაზში არ უშვებენ.
11-ვე დაკავებულს ბრალი საქართველოს სისხლის სამართლის კოდექსის 225-ე მუხლის მეორე ნაწილით აქვს წარდგენილი, რაც ჯგუფურ ძალადობაში მონაწილეობას გულისხმობს. მუხლი სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს. წარდგენილ ბრალდებას არცერთი მათგანი არ აღიარებს.
