"აგვისტოს ომის გენერლებს რუსეთთან ომის გამო ასამართლებენ" - ამ მოწოდებით პარლამენტთან საპროტესტო აქცია იმართება.
აქციის მონაწილეები აცხადებენ, რომ საპარლამენტო საგამოძიებო კომისიის მხრიდან ხდება ქართული არმიის გასამართლება და ამას ვერ შეეგუებიან.
„კრემლის ფილიალში მიმდინარეობს ქართველი გენერლებისა და ქართული არმიის გასამართლება. ჩვენ უბრალოდ, ვერ შევეგუებით ქართული არმიის გასამართლებას, იმ ადამიანების გასამართლებას, რომლებმაც 2008 წელს დამოუკიდებლობა შეგვინარჩუნეს, შეგვინარჩუნეს სახელმწიფოებრიობა, ენაც, მამულიც და სარწმუნოებაც. კრემლის ფილიალში რომლებიც სხედან, მათი ადგილი არა მხოლოდ აქ, არამედ ციხეშია. ძალიან მალე ისინი ჩასხდებიან ციხეში, აგებენ პასუხს სახელმწიფო ღალატისთვის“, – განუცხადა მედიას აქციის ერთ-ერთმა მონაწილემ.
აქციის მონაწილეები შეძახილებით დახვდნენ პარლამენტის შენობიდან გამოსულ გოგა ხაინდრავას, რომელიც დღეს კომისიის სხდომაზე დაიკითხა. „მონა“ სკანდირებდნენ პროტესტანტები ხაინდრავას მისამართით.
“ცოტა სასაცილო ვითარებაა, დარწმუნებული ვარ ცდილობენ პროვოკაციაზე წამოგვაგონ, იქიდან გამომდინარე რომ აქ აქციის დაწყებიდან ახალგაზრდები იდგნენ აქციის ინვენტარებით, ბანერებით მათ შორის და ახლა მოუწოდებენ, რომ პარლამენტის ტერიტორიას მოშორდნენ. ანუ, გამოდის, რომ გზაზე უნდა გადავიდეთ და გზაზე გადასვლის შემთხვევაში, ხან ჯარიმებს წერენ, ხან დაკავებას იწვევს ეს ყველაფერი და ცოტა გაუგებარია, მაშინ როდესაც თითქოს სამართალს უნდა იცავდნენ ეს ადამიანები ვხედავთ, რასაც აკეთებენ, წულუკიანს და ხაინდრავას იცავენ. ადამიანები, რომელიც დაკავებულები არიან ქვეყნის ღალატის ცდილობენ შელახონ ჩვენი კონსტიტუციური უფლებები და ვხედავთ რას აკეთებენ", - განაცხადა აქციის კიდევ ერთმა მონაწილემ.
ფოტო: რადიო თავისუფლება
