გარემოს დაცვისა და სოფლის მეურნეობის სამინისტროს ინფორმაციით, 2024 წელს საქართველოდან ექსპორტირებული ხილის ღირებულებამ 236 მლნ აშშ დოლარი შეადგინა, რაც წინა წლის ანალოგიურ მაჩვენებელს 14%-ით აღემატება. სასმელების შემდეგ ხილი ძირითადი საექსპორტო პროდუქტია, რომლის წილიც მთლიან აგროსასურსათო პროდუქციის ექსპორტში 14%-ს შეადგენს.
ხილის ექსპორტის ზრდა ძირითადად გამოწვეულია თხილის 21%-იანი (17,4 მლნ აშშ დოლარი), მოცვის 33 %-იანი (7 მლნ აშშ დოლარი) და ატმისა და ვაშლატამას 13%-იანი (3,1 მლნ აშშ დოლარი) ექსპორტის ზრდით.
2024 წელს თხილის ექსპორტის ღირებულებამ 100,7 მლნ აშშ დოლარი შეადგინა. თხილის ძირითადი საექსპორტო ბაზარი ევროკავშირია. 2024 წელს ევროკავშირში ექსპორტირებული თხილის ღირებულებამ 63,7 მლნ აშშ დოლარი შეადგინა. გასულ წელს თხილის ექსპორტი განხორციელდა სომხეთსა (5 მლნ აშშ დოლარი) და რუსეთშიც (3,5 მლნ აშშ დოლარი).
2024 წელს მოცვის ექსპორტის ღირებულება 28,2 მლნ აშშ დოლარი იყო. მოცვის ძირითადი საექსპორტო ბაზრებია რუსეთი, სადაც ექსპორტირებული პროდუქციის ღირებულებამ 24,3 მლნ აშშ დოლარი შეადგინა და ევროკავშირი, სადაც ექსპორტირებულია 2,4 მლნ აშშ დოლარის ღირებულების პროდუქცია.
საანგარიშო პერიოდში საქართველოდან ექსპორტირებული ატმისა და ვაშლატამას ღირებულებამ 27,9 მლნ აშშ დოლარი შეადგინა.
აღსანიშნავია, რომ მნიშვნელოვანი ზრდა ფიქსირდება გადამუშავებული ხილის ექსპორტში; ზრდამ 80%-ს (18,9 მლნ აშშ დოლარი) მიაღწია. გადამუშავებული ხილის 2024 წლის ექსპორტის ღირებულებამ 42,5 მლნ აშშ დოლარი (7,2 ათასი ტონა) შეადგინა.
