რუსეთს არ სურს, წინ გაუსწროს მოვლენებს ჯიდაში გაჟღერებულ 30-დღიან ცეცხლის შეწყვეტის საკითხთან დაკავშირებით, – ამის შესახებ კრემლის პრესსპიკერმა, დიმიტრი პესკოვმა განაცხადა.
„თქვენ ოდნავ წინ უსწრებთ, ჩვენ ამის გაკეთება არ გვინდა. გუშინ, პრესასთან საუბრისას, რუბიომ და უოლცმა თქვეს, რომ სხვადასხვა არხებით გადმოგვცემენ დეტალურ ინფორმაციას ჯიდაში გამართული საუბრის არსზე. ჯერ ეს ინფორმაცია უნდა მივიღოთ", - განაცხადა პესკოვმა.
საუდის არაბეთში გამართული მოლაპარაკებების შემდეგ, უკრაინისა და აშშ-ის დელეგაციების ერთობლივი განცხადება გამოქვეყნდა, რომლის თანახმადაც, უკრაინა ცეცხლის 30-დღიანი შეწყვეტისთვის მზადაა, აშშ კი განაახლებს სადაზვერვო ინფორმაციის გაზიარებასა და უკრაინის სამხედრო დახმარებას.
