თეთრი სახლის წარმომადგენელმა კუშ დესაიმ განაცხადა, რომ დაანონსებული 25%-იანი ტარიფები ფოლადსა და ალუმინზე, გამონაკლისის გარეშე გავრცელდება კანადისა და ყველა სხვა სავაჭრო პარტნიორისთვის.
ახალი ტარიფები გავლენას მოახდენს ევროკავშირზე, რასთან დაკავშირებითაც ევროკომისიამ უკვე განაცხადა, რომ 26 მილიარდი დოლარის ღირებულების ამერიკულ საქონელზე ტარიფებს დააწესებს.
ევროპელი ოფიციალური პირების განცხადებით, ისინი მზად არიან, იმუშაონ აშშ-ის ადმინისტრაციასთან გამოსავლის გამოსაძებნად.
"ზომები შესაძლოა მოიხსნას ნებისმიერ დროს, თუ ასეთი გამოსავალი მოიძებნება", - აცხადებს ბრიუსელი.
როგორც ევროკომისიის პრეზიდენტმა, ურსულა ფონ დერ ლაიენმა განაცხადა, ვაშინგტონის ქმედებები ზიანას აყენებს ბიზნესსა და მომხმარებლებს.
"ეს ტარიფები არღვევს მიწოდების ჯაჭვებს, შემოაქვს გაურკვევლობა ეკონომიკაში და საფრთხეს უქმნის სამუშაო ადგილებს", - თქვა მან.
"ფასები გაიზრდება როგორც ევროპაში, ასევე ამერიკაში. ევროკავშირმა უნდა იმოქმედოს მომხმარებლებისა და ბიზნესის დასაცავად".
