საპარლამენტო უმრავლესობის ლიდერის, მამუკა მდინარაძის განცხადებით, საზოგადოებისთვის მიცემული დაპირების შესაბამისად, საქართველოს პრემიერ-მინისტრთან და მთავრობასთან ერთად შემუშავდა ანტინარკოტიკული რეფორმა.
მდინარაძის თქმით, მმართველი გუნდი აპირებს, მომავალი თაობების გადარჩენისთვის ანტინარკოტიკული რეფორმა, ანტინარკოტიკული კამპანია და ჯანსაღი ცხოვრების წესის პოპულარიზაცია განსაკუთრებულ ეროვნულ პრიორიტეტად აქციოს.
მამუკა მდინარაძემ დღევანდელ ბრიფინგზე რეფორმის საკანონმდებლო მიმართულების ძირითადი საკითხებზე ისაუბრა.
„ბოლო წლების განმავლობაში ფსევდოლიბერალური იდეოლოგიისა და გარედან თავსმოხვეული მიდგომების ნაწილი იყო ე.წ. ლიბერალური ნარკოპოლიტიკა, რომელიც ერთდროულად აზიანებს, განსაკუთრებით ახალგაზრდა ადამიანების ფსიქიკას, მათ ჯანმრთელობას, გენოფონდს და არაფერი შეიძლება იყოს უფრო ანტიეროვნული, ანტიქართული, ვიდრე „ლიბერალური ნარკოპოლიტიკის“ შედეგად გამოწვეული ძალიან მძიმე შედეგები.
შესაბამისად, როგორც საზოგადოებას დავპირდით, საქართველოს პრემიერ-მინისტრთან და მთავრობასთან ერთად შევიმუშავეთ ანტინარკოტიკული რეფორმა, რომელსაც ვიწყებთ.
ასევე, განსაკუთრებული მადლიერებით უნდა აღინიშნოს, რომ ანტინარკოტიკული და ჯანსაღი ცხოვრების წესის პოპულარიზაციის კამპანიის ერთ-ერთი მთავარი ინიციატორი არის საქართველოს პრეზიდენტი მიხეილ ყაველაშვილი. რა თქმა უნდა, რეფორმის შემუშავებაში აქტიურად იყო ჩართული საპარლამენტო უმრავლესობა და ასევე საპარლამენტო ოპოზიციაც. ამ თემაზე არის აბსოლუტური ერთსულოვნება და გვაქვს იმედი, რომ საზოგადოებაც ბოლომდე დაუდგება გვერდით ანტინარკოტიკულ რეფორმას და საზოგადოებრივი მხარდაჭერით ჩვენ უკვე რამდენიმე თვის განმავლობაში პირველი პოზიტიური შედეგები გვექნება.
მინდა, გაგაცნოთ რეფორმის საკანონმდებლო მიმართულების ძირითადი საკითხები:
ყველა სახის ნარკოტიკული საშუალების გაყიდვისთვის სასჯელები მაქსიმალურად მკაცრდება, რაც ნიშნავს, რომ ნარკორეალიზატორებისთვის არა თუ განსაკუთრებით დიდი ან დიდი ოდენობის ნარკოტიკის, არამედ მცირე ოდენობით ნარკოტიკის გაყიდვისთვისაც კი სასჯელი 12-დან 20 წლამდე ან უვადო პატიმრობა იქნება.
„ორგანიზებული დანაშაულისა და რეკეტის შესახებ“ საქართველოს კანონის პროექტით განისაზღვრება ნარკოვაჭრობისა და ნარკომოვაჭრის ცნება და მოწესრიგდება მათთან დაკავშირებული ცალკეული საკითხები. კერძოდ, განისაზღვრება, ვინ შეიძლება იყოს ნარკომოვაჭრის ოჯახის წევრი, ახლო ნათესავი და დაკავშირებული პირი. ამასთანავე, დადგინდება, თუ რა ჩაითვლება ნარკომოვაჭრის ქონებად. დაიხვეწება საკანონმდებლო ჩარჩო, რითაც შესაძლებელი გახდება ნარკორეალიზატორისთვის ან ნარკოტიკების გავრცელებაში ხელშემწყობი პირისთვის მის საკუთრებაში არსებული უძრავ-მოძრავი ქონების ჩამორთმევა და სახელმწიფოსთვის გადაცემა.
2025 წლის პირველი ივნისიდან, იმ შემთხვევაში, თუ პირს დაუდასტურდება ნარკოტიკის მოხმარების ფაქტი ან თუ პირი თავს აარიდებს ნარკოლოგიურ შემოწმებას, მას სამი წლით ჩამოერთმევა ნებისმიერი სახის სატრანსპორტო საშუალების მართვის უფლება. ხუთი წლით ჩამოერთმევა საჯარო სამსახურში, პედაგოგიურ და საგანმანათლებლო დაწესებულებებში საქმიანობის უფლება, ასევე იარაღთან დაკავშირებული უფლებები.
ცვლილებები, გამკაცრების მიმართულებით, შეეხება სისხლის სამართლის, ადმინისტრაციულ სამართალდაღვევათა კოდექსის, ნარკოტიკული დანაშაულის წინააღმდეგ ბრძოლის შესახებ კანონის სხვა შესაბამის ნორმებსაც.
აქვე, მივმართავთ კერძო სექტორის წარმომადგენლებს, რომ გაიზიარონ ეს მიდგომები და სახელმწიფოს ამოუდგნენ გვერდში ანტინარკოტიკული კამპანიის წარმოებაში და ჯანსაღი ცხოვრების წესის პოპულარიზაციაში.
მომავალი თაობების გადარჩენისთვის ჩვენ ვაპირებთ ეს საკითხი – ანტინარკოტიკული რეფორმა, ანტინარკოტიკული კამპანია და ჯანსაღი ცხოვრების წესის პოპულარიზაცია ვაქციოთ განსაკუთრებულ ეროვნულ პრიორიტეტად“, – განაცხადა მამუკა მდინარაძემ.
ამასთან, მამუკა მდინარაძის განმარტებით, შემოწმების მიზნით ადამიანების ნარკოლოგიურში იძულებით გადაყვანა არ მოხდება. მამუკა მდინარაძის განცხადებით, შემოწმებაზე უარის თქმა გამოიწვევს ცალკე ადმინისტრაციულ სახდელებს, თუმცა სწორი მიდგომა არ იყო, როცა უარის შემთხვევაში, პირი ავტომატურად ითვლებოდა ნარკომომხმარებლად.
„თქვენ გახსოვთ ალბათ პერიოდი, როდესაც ადამიანები შემოწმების მიზნით პოლიციას იძულების წესით მიჰყავდა ნარკოლოგიურში. ასეთი მიდგომა არ იქნება. პიროვნებას ექნება შეთავაზება, რომელთან დაკავშირებითაც იქნება გარკვეული ინფორმაცია პოლიციელის მხრიდან – პრაქტიკულად სერვისი იქნება, თუმცა ეს ნამდვილად არ არის საირონიო. მას შეეთავაზება, რომ პოლიციელი გადაიყვანს შემოწმებაზე, ან თავად ექნება უფლება, რვა საათის განმავლობაში მივიდეს ნარკოლოგიურ დისპანსერში, გაიაროს შემოწმება თავად და 24 საათის განმავლობაში წარუდგინოს ინიციატორ პოლიციის ორგანოს შესაბამისი ცნობა.
გარდა იმისა, რომ არანაირი იძულების ფორმა არ ექნება, თუ არ უნდა მოქალაქეს, თავად წავა და თავადვე აიღებს შესაბამის ცნობას, აქ საყურადრებოია ისიც, რომ თუ უარს განაცხადებს, გვახსოვს პერიოდი, როცა უარის თქმა ნიშნავდა, რომ ავტომატურად ეს ადამიანი ითვლებოდა ნარკომომხმარებლად. ეს არ იყო სწორი მიდგომა, უარის თქმა გამოიწვევს ცალკე ადმინისტრაციულ სახდელებს, ოღონდ იგივე სახის. თუ უარს განაცხადებთ, ეს არ ნიშნავს, რომ თქვენ გიდასტურდებათ ნარკომოხმარება. ეს ნიშნავს, რომ თქვენ საკუთარი ნებით იღებთ ადმინისტრაციულ სახდელს, ოღონდ, ეს სახდელი იქნება იგივე, რაც იმ შემთხვევაში, თუკი ადამიანს დაუდასტურდება ნარკოტიკის მოხმარება. მარიხუანას ეხება გამკაცრება გაყიდვის მიმართულებით.
გასაღება ითვლებოდა ყველანაირი სახის გადაცემა აქამდე, ჩვენ შემოვიტანეთ გაყიდვის ცნება. თუ იქნება შენიშვნა, შეგვიძლია, პირველი, მეორე მოსმენის დროსაც შევცვალოთ, ვთქვათ – მატერიალური გამორჩენის მიღების მიზნით გადაცემა, შეიძლება ეს სხვა სიტყვებით იყოს, მაგრამ ყველა შემთხვევაში ნიშნავს რეალიზაციას და გარკვეული თანხის მიღებას ანაზღაურების სანაცვლოდ. რა სიტყვით გამოვხატავთ, ამას არ აქვს საერთოდ მნიშვნელობა. გასაღება ზოგადი, რაც ნიშნავს, რომ ვთქვათ, ნარკოტიკი ერთმა ადამიანმა მეორეს გადასცა, უბრალოდ აჩუქა, არის ხოლმე შემთხვევები, როცა მეგობრები ერთმანეთს გაუყოფენ ნარკოტიკს, ნარკომომხმარებლები და ა.შ. ესეც გასაღებაა, საკმაოდ მძიმე სასჯელი იყო ამაზე და ეს რჩება. მაგრამ თუ პირს დაუდასტურდება, რომ რეალიზებას ახდენს, ანუ ყიდის ნარკოტიკს, აქ სასჯელები კიდევ უფრო მკაცრდება და მცირე ოდენობით გაყიდვისთვისაც კი, იქნება 12-დან 20 წლამდე და უვადო თავისუფლების აღკვეთა, აღარ მაქვს საუბარი დიდი ოდენობით და განსაკუთრებით დიდი ოდენობით, 14-დან და 16 წლიდან დაიწყება ასეთი სასჯელები. შეუვალი და მკაცრი იქნება სახელმწიფო. გაუთანაბრდება პრაქტიკულად სასჯელი მკვლელობას, რადგან მკვლელობის შემთხვევაში თუ ერთ ადამიანს კლავ, დროთა განმავლობაში განგრძობადად კლავ ბევრ ადამიანს, როდესაც ნარკოტიკულ საშუალებას ყიდი. ამიტომ ეს ჩვენ მიერ განხილულია, როგორც მკვლელობა, ოღონდ მასობრივი და სახელმწიფო ამის მიმართ იქნება შეუწყნარებელი“, – განაცხადა მამუკა მდინარაძემ.
