ვულოცავ მდინარაძეს გამბედაობას, რადგან „დიფ სთეითის“ ახალი ინტერპრეტაცია წარმოგვიდგინა და მტრად შერაცხა ქვეყნები, რომლებიც საქართველოს სუვერენიტეტს, ევროპულ მისწრაფებას უჭერდნენ მხარს, – ამის შესახებ „გახარია საქართველოსთვის“ წევრმა, თეონა აქუბარდიამ განაცხადა.
აქუბარდია საპარლამენტო უმრავლესობის ლიდერის, მამუკა მდინარაძის ფეისბუქპოსტს გამოეხმაურა.
„ჯერ იყო და, ივანიშვილის პროპაგანდის თანახმად, გლობალური ომის პარტია იყო მტერი, თუმცა ცოცხალი თავით არ გვიმხელდნენ უშუალოდ სახელს, ვინ იყო ამ გლობალური ომის პარტიაში. ახლა უკვე „დიფ სთეითია“ მტერი და არა – რუსეთი, რომელსაც ჩვენი ტერიტორიების 20 პროცენტი აქვს ოკუპირებული, და, მათ შორის, ივანიშვილის ბოდიშის შემდგომ, ოკუპირებული აფხაზეთისა და ცხინვალის რეგიონის აღიარებას ითხოვს. ახლა უკვე გავიგეთ, რომ „დიფ სთეითის“ მტრის ხატი იქმნება ბალტიისა და სკანდინავიური ქვეყნებიდან, რაც კიდევ ერთხელ აჩვენებს, რომ, ერთი მხრივ, ისინი იგონებენ მტერს და უკვე ასახელებენ კიდეც, მეორე მხრივ, ნამდვილ მტერს არათუ პასუხს უბრუნებენ, არამედ, მათ შორის, დუმილს არჩევენ. ეს მაშინ, როდესაც ივანიშვილის სამარცხვინო ბოდიშს რუსეთი დამატებითი მოთხოვნებით პასუხობს, რომ ჩვენ უნდა ვაღიაროთ ოკუპირებული ტერიტორიების ეგრეთ წოდებული დამოუკიდებლობა, მაშინ როდესაც სწორედ ეს ჩვენი მეგობრები, რომლებსაც ივანიშვილი, მდინარაძე მტერსა და „დიფ სთეითს“ უწოდებენ, სწორედ ჩვენი სუვერენიტეტის მხარდაჭერის ფარად იდგნენ. შესაბამისად, ეს კიდევ ერთხელ აჩვენებს, რომ ივანიშვილის რეჟიმს სანქციების ნამდვილად ეშინია, რადგან სწორედ დასახელებული ქვეყნები არიან სანქციების ერთ-ერთი ფლაგმანი ქვეყნები. ჩემთვის ცხადია, რომ მტრის დასახელების რაოდენობა გაიზრდება, გამომდინარე იქიდან, რომ აუცილებლად გაიზრდება სანქციები, რადგან ივანიშვილი უპირისპირფება საკუთარი ხალხის სუვერენულ, კონსტიტუციურ არჩევანს. ვულოცავ მდინარაძეს გამბედაობას, რადგან „დიფ სთეითის“ ახალი ინტერპრეტაცია წარმოგვიდგინა და უკვე მტრად შერაცხა ის ქვეყნები, რომლებიც საქართველოს სუვერენიტეტს, ტერიტორიულ მთლიანობას და, ზოგადად, საქართველოს ევროპულ მისწრაფებას მხარს უჭერდნენ. ამ ვითარებაში კარგად ჩანს, ვინ არის ნამდვილი მეგობარიც და ვინ – მტერი ქვეყნის გაცხადებული ინტერესებისა“, – განაცხადა თეონა აქუბარდიამ.
