თბილისის საქალაქო სასამართლოში, ე.წ. პიჯაკების საქმეზე, საქართველოს მე-3 პრეზიდენტის მიხეილ სააკაშვილისა და სახელმწიფო დაცვის სპეციალური სამსახურის ყოფილი უფროსის, თემურ ჯანაშიას სასამართლო სხდომა მიმდინარეობს. დღევანდელ სასმართლო სხდომაზე ბრალდებულები მოსამართლეს დასკვნითი სიტყვით მიმართავენ.
მიხეილ სააკაშვილმა, რომელიც სხდომას კლინიკა ვივამედიდან დისტანციურად ერთვება, საკუთარ დასკვნით სიტყვაში თქვა, რომ პრეზიდენტობის დროს, მისი ხელფასი 3000-დან 4000 ლარამდე იყო და ამ ფულით დონალდ ტრამპსა და ჰილარი კლინტონს ვერ გაუმასპინძლდებოდა.
"დღევანდელი საქმე რატომ დაიწყო?! 2015 წელს როდესაც ღარიბაშვილს, მაშინდელ პრემიერმინისტრს, რომ ჰკითხეს ჩემს წინააღმდეგ აღძრული საქმის შესახებ, მან თქვა: "აბა არ ჩერდებოდა და რა გვექნაო". პირდაპირ დაემთხვა ეს საქმე ჩემი უკრაინის პრეზიდენტის მრჩევლად გახდომას. შემდეგ დაპატიმრების სანქცია გაიცა, მას შემდეგ რაც უკრაინაში, ოდესის ოლქის, სტრატეგიულად ყველაზე მნიშვნელოვანი ოლქის, გუბერნატორი გავხდი.
2021 წელს როდესაც საქართველოში დავბრუნდი, ხელახლა გაპრემიერებულმა ღარიბაშვილმა განაცხადა თუ არ გაჩერდება კიდევ დავუმატებთო. ზუსტად ეს ხდება. მე ვაგრძელებ ბრძოლას, ქართველი ხალხი აგრძელებს ბროლას. უნდათ, რომ დაგვაშინონ, კედელთან მიგვაყენონ, წაგვართვან მომავლის იმედი.
საქმე თუ აინტერესებს ეხება იმას, რომ პრეზიდენტის ოფისს აქვს ხარჯები. საქართველოს პრეზიდენტის ხელფასი მაშინ იყო 3000-დან 4000 ლარამდე. ახლანდელი ე.წ. დეპუტატების ხელფასები თითქმის 3-ჯერ მეტია. ამ ფულით ვერც ტრამპს გავუმასპინძლდებოდი, ვერც ჰილარი კლინტონს. ვერც საჩუქრებს ვერ დავარიგებდი საპრეზიდენტოს ძალიან ბევრი კულტურის მოღვაწის, საზოგადოებრივი აქტივისტების, უცხოელი დელეგაციების მიმართ. ბუნებრივია, ეს ყველაფერი იყო საპრეზიდენტო ოფისის ხარჯები, რომელიც უშიშროების საბჭოს გადაწყვეტილებით გასაიდუმლოებული იყო, რომ არ სცოდნოდათ ჩვენ მტრებს პრეზიდენტის გადაადგილების შესახებ, ვის ხვდებოდა პრეზიდენტი, ვინ ჩამოდიოდა ჩვენთან. ეს ყველაფერი იყო გრიფით საიდუმლო იყო. ესენი მოვიდნენ და გრიფით საიდუმლო მოხსნეს მხოლოდ პრეზიდენტის ოფისის ხარჯებზე. თავად გააგრძელეს აქტიურ რეჟიმში საიდუმლო ხარჯვა ყველაფრის". - თქვა მიხეილ სააკაშვილმა.
სააკაშვილის თქმით, უმეტეს ქვეყანაში, პრეზიდენტის ხარჯები იფარება სახელმწიფოს მიერ.
"ყველა ქვეყანაში პრეზიდენტი იღებს სტუმრებს. ყველა ქვეყანაში პრეზიდენტი მისი შეხედულებისამებრ გადასცემს პირად საჩუქრებს. უმეტეს ქვეყნებში პრეზიდენტის მკურნალობის ხარჯები იფარება სახელმწიფოს მიერ. აბა, რანაირად უნდა მემკურნალა, როცა რაღაც მჭირდებოდა, მათ შორის ზოგჯერ ქირურგიული ჩარევაც სამი ათას რაღაც ლარიანი ხელფასით?! ეს ყველაფერი იფარება სახელმწიფოს მიერ". - განაცხადა სააკაშვილმა.
ე.წ. პიჯაკების საქმეზე პროკურატურა მიხეილ სააკაშვილსა და თემურ ჯანაშიას პრეზიდენტის სარეზერვო ფონდიდან დიდი ოდენობით თანხების გაფლანგვის ედავება.
