ევროპულმა საბჭომ შეხვედრის დასრულების შემდეგ უკრაინასთან დაკავშირებით დასკვნა გამოაქვეყნა, რომლის თანახმად, ევროკავშირი კვლავ მტკიცედ და ურყევად უჭერს მხარს უკრაინის დამოუკიდებლობას, სუვერენიტეტსა და ტერიტორიულ მთლიანობას მისი საერთაშორისოდ აღიარებული საზღვრების ფარგლებში.
წინადადება, რომელიც სამიტზე ევროპულმა საბჭომ წარადგინა, მოიცავს ევროკავშირის წევრი ქვეყნების მიერ მიმდინარე წელს უკრაინისთვის 30.6 მილიარდი ევროს ღირებულების სამხედრო და ფინანსური დახმარების გადაცემას, კიევის შეიარაღებითა და საბრძოლო მასალებით უზრუნველყოფას, სამომავლო რუსული აგრესიისგან ქვეყნის დასაცავად უკრაინისთვის უსაფრთხოების გარანტიების შექმნასა და უკრაინის ევროკავშირში გაწევრიანების საკითხს.
"უკრაინის წინააღმდეგ რუსეთის აგრესიის ომს უფრო ფართო შედეგები მოაქვს ევროპისა და საერთაშორისო უსაფრთხოებისთვის. ომის დაწყებიდან ევროკავშირი და მისი წევრი სახელმწიფოები, პარტნიორებთან და მოკავშირეებთან ერთად, ხაზს უსვამენ ომის დასრულების საჭიროებას ყოვლისმომცველი, სამართლიანი და გამძლე მშვიდობის გზით, რომელიც გაეროს ჩარტერისა და საერთაშორისო სამართლის პრინციპებთან თანხვედრაშია. ევროპული საბჭო მიესალმება ნებისმიერ ძალისხმევას ამგვარი მშვიდობის მისაღწევად". - წერია ევროპული საბჭოს წინადადებაში.
დასკვნას მხარი დაუჭირა ევროკავშირის 26-მა სახელმწიფოს მეთაურმა. წინადადების დასამტკიცებლად ხმის მიცემისგან თავი შეიკავა უნგრეთმა.
თუმცა, ევროკავშირის 27-ვე წევრი სახელმწიფოსგან მხარდაჭერა მიიღო ევროპული კომისიის პრეზიდენტის, ურსულა ფონ დერ ლაიენის მიერ წარდგენილმა გეგმამ ReArm Europe (ევროპის ხელახალი შეიარაღება), რომელიც ბლოკის თავდაცვის ერთობლივი ბიუჯეტისთვის 800 მილიარდი ევროს მობილიზებას ითვალისწინებს.
