უკრაინის პრეზიდენტმა, ვოლოდიმირ ზელენსკიმ შეხვედრა გამართა აშშ-ის სენატის ორპარტიული დელეგაციის წევრებთან.
„ჩვენი განხილვის მთავარი თემები იყო უკრაინისთვის სამხედრო დახმარების გაგრძელება, შესაბამისი საკანონმდებლო ინიციატივები, ჩემი შეხვედრა პრეზიდენტ ტრამპთან, სამართლიანი და მყარი მშვიდობის მიღწევის ძალისხმევა, ომის დასრულების ჩვენი ხედვა და მტკიცე უსაფრთხოების გარანტიების მნიშვნელობა“, – წერს ზელენსკი X-ზე.
ზელენსკიმ აღნიშნა, რომ ამაყობს აშშ-ის მსგავსი სტრატეგიული პარტნიორებით.
„ვამაყობთ, რომ გვყავს ისეთი სტრატეგიული პარტნიორები და მეგობრები, როგორიც არის შეერთებული შტატები. მადლიერები ვართ უკრაინისთვის ორპალატიანი და ორპარტიული მხარდაჭერისთვის რუსეთის სრულმასშტაბიანი აგრესიის სამივე წლის განმავლობაში“, – აღნიშნა ზელენსკიმ.
ამჟამად უკრაინის პრეზიდენტი აშშ-ის პრეზიდენტს, დონალდ ტრამპს ხვდება.
