აშშ-ის პრეზიდენტმა დონალდ ტრამპმა განაცხადა, რომ სამშვიდობო მოლაპარაკებები უკრაინის წინააღმდეგ რუსეთის ომის დასასრულებლად სწრაფად მიმდინარეობს. ამის შესახებ ტრამპმა ბრიტანეთის პრემიერ-მინისტრთან, კირ სტარმერთან ერთობლივ პრესკონფერენციაზე განაცხადა.
„მე მქონდა სატელეფონო საუბრები პუტინთან და ზელენსკისთან და ჩვენი გუნდი ესაუბრა ნატო-ს გენერალურ მდივანს ამ ომის შესაჩერებლად. ვფიქრობ, კარგ პროგრესს ვაღწევთ, სწორი მიმართულებით მივდივართ. ვფიქრობ, ეს ან ძალიან სწრაფად, ან არასდროს მოხდება“, - თქვა ტრამპმა.
ტრამპმა აღნიშნა, რომ უკრაინაში შემდეგი ნაბიჯი უნდა იყოს ცეცხლის შეწყვეტა და, ამერიკის პრეზიდენტის თქმით, ამის მიღწევა რაც შეიძლება სწრაფად უნდა მოხდეს.
„როგორც მე განვიხილე პრემიერ-მინისტრ კირ სტარმერთან, შემდეგი ნაბიჯი, რომელსაც ჩვენ გადავდგამთ, არის ცეცხლის შეწყვეტა. ჩვენ ვიმედოვნებთ, რომ ეს, შეიძლება, სწრაფად მოხდეს. ეს საფუძველს ჩაუყრის გრძელვადიან სამშვიდობო შეთანხმებას, რომელიც დააბრუნებს სტაბილურობას აღმოსავლეთ ევროპაში, და ვიმედოვნებთ, რომ ასეთი საშინელი ომი აღარასოდეს განმეორდება ევროპულ მიწაზე ან სხვაგან“, – განაცხადა ტრამპმა.
ამასთან, აშშ-ის პრეზიდენტმა აღნიშნა, რომ სასარგებლო წიაღისეულის შესახებ შეთანხმება, რომელსაც ხელს, სავარაუდოდ, თეთრ სახლში ხვალ უკრაინის პრეზიდენტთან, ვოლოდიმირ ზელენსკისთან ერთად მოაწერს, „საფუძველს ჩაუყრის აშშ-სა და უკრაინას შორის უფრო მდგრად სამომავლო ურთიერთობებს“.
